Ka khubor wa da dang yoh chooh chooh heiyatoh wa i ya tyrrah kari hapyrdi ka Truck Tanker wa kawi ka thuk thuk, da antaad wa da jia i heipor kamwa 7:00 hadooh 7:20 i step ha chnong Wahiajer, East Jaiñtia Hills.
Hei takit ki pulit da chem wa kani ka thuk thuk toh kawa em Number AS-024N-5538 katwa ka Tanker won NL-01L-0813.
Chooh chooh da chem wa waroh ar tylli ki kari toh kiwa lai chei joohi i liang, itæ cha Lumshnong tangwa manda poi Wahiajer ha u sarok NH-6, da ya tyrrah ki heiwa uni uwa yah thuk thuk toh uwa tip kam u Deba Basumatary (17 snem) u khon u Bishnu Basumatary uwa sah ha Borbil Milampur iwa dang haap hapoh i pait ka Police Station Kampur, Nogaon, Assam wei da khlaad u ha ini i thaw wa jia.
Hadien wa leh yeiwa emkaam, da phah yei metyap yow leh Post-Mortem ha Khliehriat Civil Hospital wei da e kti yei metyap cha kiwa ha-yung ha-sem u yow pyndep ki ya ka niam ka rukom.
Uwa yah ya kani ka Tanker toh uwa pyrtuid Diganta Boruah (30 snem) uwa na Kanubari Balijan Ouguri Pathar, Charaido, Assam uwa da chah ksoh ha ki pulit yow takit wei da phah leh ya kiwa ha-yung uwa khlaad wow e FIR ki.
Discussion about this post