Shillong: U Montri Rangbah ka jylla, u Conrad K Sangma da pyntip u wa da chah ktah sa uwi u bru wa da heh rta ha u COVID-19, wei ym ye u chim næ pyntikna wa kani ka khlam da poor ko cha kiwa chong chnong næ ka Community Transmission, neibhah wa ye u man wa em kiwa ha yung kiwa wan na baar ka jylla næ ye u wow yachem wa kiwi won kiwa wan na baar.
U Conrad da ong u wa ki paidbah ym toh u wow sñiaw syier neibhah waka sorkar dang thooh bniah ya i tre wa chah ktah ha u COVID-19, wei nadooh wa sdang wa em i suba wa ye uni u bru u chah ktah ha u COVID-19, da booh bait ha i pait bniah wa kyrpang katkam ki kyndon. Da ong u wa ka chnat i chait i khiah da thooh ko leh yaki bru wa yajan uni u bru.
Uni u bru toh uwa da palat 70 snem i rta naka chnong Umsamlem, Ri-Bhoi District wei neidaw wa chitom da pynkit noh da kiwa ha yung cha Dr. H. Gordon Robert Hospital, Shillong ha ki kajiak sngi wa da dep wow chah sumaar, tangwa hadien wa chim yaki nongmuna (Sample) wow phah Test, ka Report da pynyoo wa da chah ktah ha u COVID-19. Ya uni u waheh katni dang booh hi ha Robert Hospital Isolation Ward.
Hanla u Montri Rangbah da ong u wa ym ye wow chim wa ini toh ka Community Transmission, tangwa neiliang u montri i chait i khiah ka jylla, u Alexander Laloo Hek da ong u wa ini i chah ktah yong uwa chong chnong uwa em bait ha ka jylla rap pynsyier ko kajiak yaka imlang sahlang neibhah hadooh kattæ ym pu yoh yutip wa yei yi yachem u, deiwa pyntikna wa ym toh iwa poor na kiwa wan na baar jylla.
Chooh chooh da ong u wa neiliang ka chnat i chait i khiah da sdang ko wow phah Test ya ka nongmuna (Sample) yong uwi u pyrsa kurim, wei kamjooh ya kiwi kiwa yachem u. Da pyntip wa uni u pyrsa kurim toh uwa yah kari wei ye u yabi hawa lai wa wan u.
Ha iwi i liang, u Hek u da phah u yaka khubor cha ki paidbah wa ym toh u tieñ ki, neibhah wa kani ka khlam ym toh kawa ym ye u pynchait, tangwa hadooh kattæ hanla ym em ki dawai neibynta uni u khñiang da em boon kiwa chait, deiwa ong leh wa emkaam dooh yaki paidbah wow bood pynrkhiñ ya ki kyndon wa da phah da ka chnat i chait i khiah.
