Ka Nagaland da yoh yarap ko na u slap yow jop ya ka Meghalaya da 10 Run ha ka yalehke ka Vinoo Mankad Trophy ha Ranchi ynne ka sngi.
Ka Meghalaya da yoh ko 165/5 na 45 Over katwa ka Nagaland da yoh ko 106/4 na ki 31.3 Over, iwa da biang wow pynjop deiwa kheiñ da ka VJD Method kawa man da kawi ka rukom kheiñ na ka Duckworth-Lewis.
Ka Meghalaya da pynemkaam ko da ki jooh kiwa yalehke kiwa jop ya ka Arunachal Pradesh ynnin ka sngi. Sa chisien da rem ko ya ka kylla khlem heiwa da phah ya ka wow Bat nyngkong tangwa waroh le ngut kiwa Bat wa kynthup ya u Josiah Momin uwa yoh spah Run ynnin ka sngi da haap ki deiwa yoh nod.
Tangwa u Captain Kevin Christopher (46) wa u Rohit Yadav (14) da ye ki wow kamai lang 60 Run neibynta ka Wicket wa soo. Da haap won ki uwi hadien uwi hadien 9 bol, iwa da pynkit won hei tympha u Mrityunjay Bharali (50 Not Out) wa u Bharat Gurung (36 Not Out).
Kini ki arngut da kamai ki ya kiwa sah ki Run kiwa 97 neibynta ka Wicket wa 6. Da sdang ki wow kamai bha tangwa da wan u slap ha ka Over wa 45 deiwa yoh 165/5.
Hadien wa kut u slap da pynkylla ya ka thong cha 156 Run na ki 41 Over yow kdong ka Nagaland.
U Waldo Sangma da ka bol da yei u wow pynhaap ya ki arngut kiwa wai yei kamai. Heiwa da kawang u 6 Over wa kyntup ya 3 tylli ki Maiden Over deiwa yoh 2/8. Tangwa ym yoh u pynlut ya waroh ki Over hadien wa wan biang u slap.
Ka Nagaland da ye ki wow yakhun lyngba u Yugandhar wa u Thejasilie Savino, kiwa da kamai 53 Run neibynta ka Wicket wa le. Kini de ye ki wow kamai suki suki deiwa yoh hapoh 6 Run chi Over.
Hanla u Savino wa sa uwi da chah pynhaap ki, i yei wow kamai Run deiwa biang chwa wow hiar biang u slap hapyrdi ka 32 Over wei khlem da sangeh biang u slap, ka Nagaland da em 10 Run hakhmat ka Meghalaya katkam wa kheiñ da ka VJD, kamtæ da pynbna ya ki kam kiwa jop.
Najrong u Sangma, kiwi de kiwa yoh Wicket ya ka Meghalaya toh u PM Santosh (1/21) wa u Gavineal Marpna (1/35).
Ka Meghalaya kattu daw yachem ko wa ka Mizoram ha kani ka sngi Thohdieñ.
