Ka Dorbar Chnong Rymbai, East Jaiñtia Hills District hadien wa yoo ko yei boon ki khon ka chnong kiwa ngop hei dih drugs kat nang lai ki sngi wei wot hawa pyrchang ka chnong u yakhun pyndooh pyndam ya ini i jait dih leh chem ki wa man iwa eh wa saja, kamtæ ha kani ka kynti da sdang ki da ka Anti Drugs Abuse Committee deiwa yooluti wa lyngba kani ka Committee u ye ki wow thooh laad thooh luti rap bha neibynta u yakhun pyrchah ya ini i jait dih.
Kamtæ kam i sdang lai luti kani ka Committee, ha ka 25 tarik uni u bnai kam chibynta ka International Day Against Drug Abuse and Illicit Trafficking da sdang wow pynman dei pynsñiawthooh paidbah hajrong i maa i drugs ya ki bru wa dih kamjooh yaka imlang sahlang.
Ha ka yalang wa da pynman ha yung dorbar ka chnong Rymbai da emlang u Kyrmen Shylla, MLA ka thaaiñ uwa man leh u Montri sorkar, ka Voilet Lyngdoh, MDC ka thaaiñ, ki dkhot yahkhmat chnong, ki khynnah skur, ki khynroo khyllood, ki manbei manpa ka chnong wa kiwi.
Neiliang u waheh chnong, u Lembad Swer wa u Secretary ka Anti Drugs Abuse Committee, u Mover Lyngdoh khana ki wa kani ka Committee neini chaphrang u thooh ko waroh ki laad ki luti yow ye u pyndooh jait ya ini i jait dih, wa kamjooh ki laad yarap neibynta kitu wada kyrni dih drugs.
Kamtæ khut ki i yakrehlang yong ki paidbah ka chnong ha kiwon kiwon ki bynta khnang wa i thmu wa bha neibynta ki khon ka chnong waka imlang sahlang hi u man kawa jop.
U Kyrmen Shylla hawa klam kam u kongsan ong u to u man i ki bru wa pyrkhat jngai deiwa kyntait naphang yei drugs neibhah chisien wa da ngop man iwa khor wa eh u yait, najrong wa jynjar kthang ka yung ka sem.
Ong haroh u wa haka pyrthai rhah bor, wa i choon i bichni ya kiwi, ym ye leh u tip boi ki bru wa pynngop dih drugs em chwa ki i thmu u pynjæd pynsih ya ki bru samen, wei i chim kabu ki bru u wanrah drugs hapoh ka chnong ka thaw leh em ki i thmu pynsih pynjæd pynpra yei man yatylli ki paidbah kamjooh i ku ka chnong ka thaw.
Wei yow pynngop hawa sdang dei mynkna e maad ki, tangwa manda chah kdoh chah khoom won, hap dei thied syad, wei lada ym yoh poisa wot u tooh u thiem næ u leh ki kaam sih wa boonjait leh ym swe de.
Kamtæ yooluti u wa ini i thmu yakhun thma drugs ka chnong Rymbai u man ko kawa jop ha chirup i yakrehlang wa oo.
Kiwi won wa e i klam toh ka Voilet Lyngdoh MDC wa u Pastor In-charge ka chnong Rymbai u S.R. Dkhar.
Katwa yei klam batai bniah heiyatoh wa kani ka sngi da yoh na u Barry L. Kharmalki uwa da khana leh yei jait kjut waphær waphær wa ye u yoh neiwa dih drugs.
Discussion about this post