Hadien wa mih i chah klam khlemakor wa i klam beiñ pyrchah ya ki kynthai wa ki khynnah ha ki Social Media, neiliang yong ki da sdang mih wei da sdang sangeh noh ki wow pynemkaam ya kini ki Social Media ha kylleiñ ka pyrthai, ini toh katkam wa chem ka seiñ Plan International ha i puræ biah (Study) heiwa da chem wa em hadooh 58% ki kynthai kiwa da chah klam khlemakor (Abuse).
Ya ini i puræ bniah da leh da ka Plan International, heiwa da kylli yutip ki na ki 14,000 ngut ki kynthai kiwa em hapyrdi 15-25 snem i rta na ki 22 tylli ki ri kiwa kynthup ya ka India, Brazil, Benin, US wa kiwi kiwi.
Ka Plan International toh kawi na ki seiñ kawa kreh monsñiawbha ha ki 71 tylli ki ri ha Africa, ki Americas wa Asia wow yarap pynjanai ya i rukom im ki khynnah khamtam ki kynthai.
Ha ini i puræ bniah da chem wa ka Facebook toh ka Social Media heiwa em 39% ki kynthai kiwa da chah klam beiñ chah pyndik (Harassment) ki wei chah klam khemakor ki, bood won ka Instagram (23%), Whatsapp (14%), Snapchat (10%), Twitter (9%) wa TikTok (6%).
Da chem wa kawi na ki san ngut ki khynnah da sangeh wei da pynduna ki yei pynemkaam ya kini ki Social Media wei kawi na ki 10 ngut won kiwa da pynkylla ya i rukom klam ki Online.
Chooh chooh da em 22% kiwa da ong wa ki namo ki lok ki yong ki da mih ki na ki Social Media neidaw wym em sñiaw chngaaiñ ki.
Katkam ka khubor ka DW da ong ko wa ka Facebook, Twitter wa Instagram da pait bniah ki yeini i rukom klam wei da sdang pynemkaam ki leh ya ki stat ka juk namo ka Artificial Intelligence wow pait lada em iwon iwon i rukomklam lait ha kini ki Social Media.
