Ynne ka sngi kiwa yah truck kiwa em kamwa sanphaw ngut kiwa da chah ksoh ha ka Weighbridge Khliehtyrchi kawa em ha u sarok Jowai Bypass, dei mynsien wa khia wei chrai wa da chah ksoh ki la le sngi, da tia ki cha ka Weighbridge wow pynsñiaw yei chrai yong ki wei wow dawa wow pynlait noh ya ki.
Kini ki truck da chah ksoh ki ha ini i thaw toh hadien wa pynmih ka chnat Transport ka sorkar jylla, ha ka 28 tarik kawa ong wa ka DC ka Ri-Bhoi District wa da khang pyrchah ko ya ki kari kiwa kit palat 40 MT wow lai na Dwar Ksuid Bailley Bridge nadooh 7:00 i miet hadooh 6:00 i step wei da khang leh ya ki kari wa kit palat 20 MT wow lai ki lyngba ka Umiam Dam hadien wa da khang ya ki kari wow lai ki na Dwar Ksuid ha ini i jooh i por.
Neiliang kiwa yah Truck da ong ki da khñium ki yeini i chah ksoh ha kani ka Weighbridge neibhah wa ym em u e por næ u pyntip chwa ya ki chwa wow kit mar ki wei da phylla ki leh wa da chah du ya kattu katni tylli ki truck wa da lait ki u lai.
Da ong ki wa da em ki truck wa lait u lai wei manda yachem ki ya kiwa pynlai ya kani ka thaw da ong ki wa kitæ ki truck kiwa lai ymtoh wa lait ki tangwa da yut ki na ini i thaw, wei ini da pynchrai i ya kiwa yah Truck neibhah wa ym em u khang ya kini ki truck wa yut hanlada biang ki wakreh wa ki bor (pulit) wa sonteri ya kani ka thaw katwa kini ki truck won kiwa em ha ini i thaw da chah ksoh bait ki.
Chooh chooh da ong ki wa da su ya kani ka Weighbridge T. 1,500 wa cha u MVI T. 500 tangwa ym em u pyntip cha ki wow maham ya ki wa ymtoh de wow kit ki palat ya ka hukum wa da chah u kit.
Kiwa boon hi kiwa yah Truck da ood ki wa ymye ki wow chong neh bait chi thaw ha jooh kamni neibhah i baam i dih leh duna wei man i leh iwa sy’ad ya ki wow chong kamni chi thaw don boon sngi.
Hadien ini kini kiwa yah truck kiwa chah ksoh ha ini i thaw kiwa em kamwa palat sanphaw ngut, da tia ki cha ka Weighbridge wei da yaklam ki wa u K. Tynsong, uwa man kam u Enforcement Inspector ka chnat Transport uwa em ha ini i thaw heiwa da pynsñiaw ki yei chrai neibhah wa da lait kattu katni tylli ki truck katwa ya ki da ksoh wei da phah uiñ biang ya ki chadien wei ki ym em hiwot u tip ki hajrong kini ki hukum.
Neiliang u Tynsong da pynsñiaw u yei duna ha i kreh heiwa da em ki kari kiwa lait wei ki leh emkaam wow bood ki ya ki kyndon wa da phah ka sorkar.
Hadien i yañia wa boon iwa da neh kattu katni por neiliang u Tynsong hadien wa yohbor na kiwa hajrong da chah noh ya ki kini ki truck kiwa em ha ini i thaw wow mih noh ki na ini i thaw katwa kiwa em cha Ialong wa East Jaiñtia ym chah ya ki wow mih ki, deiwa pynrap wa nadooh myntu lada man katwa man ym pynlait de ya kiwon kiwon kiwi ki truck wow lait ki na ini i thaw kiwa kit palat pood.
U Tynsong da pyntip u leh wa ya kiwa da chah wow mih noh na kani ka thaw emkaam u su ki ya ka kuna (Fine) kawa T. 500 wa T. 1,000 katkam ki kyndon wa da tyngkheiñ kini ki truck deiwa kit palat pood.
