Hadien wa joor i yakhih ha North Eastern Hill University (NEHU), Shillong, neiliang u Montri ka chnat Education ka jylla, u Rakkam A. Sangma da kyrpaad u ya Education Minister ka sorkar India, u Dharmendra Pradhan wow chimkhia smat yeini.
I kynaad ha kani ka skurbah da sdang i na ka 25 tarik u Naichiphaw hadien wa kiwa sikai kamjooh ki khynnah da yakhih ki pyrchah ya u Vice Chancellor, u Registrar wa u Deputy Registrar hajrong i wym ye u pynbait ya ki kaam heiwa ka North Eastern Hill University Students’ Union (NEHUSU) da sdang ko da i chah thngan na ka 5 tarik uni u bnai wow dawa hiar chuki ya u VC, u Prof. PS Shukla.
Ha ka chithi wa da thoh u Rakkam da ong u wa da chah ktah bha i chait i khiah ki khynnah wa chah thngan deiwa ong wa i yakhih da poi i ha u pood wa da hap kit ya ki khynnah cha thaw sumaar wei hanla mih ki na thaw sumaar da pteiñ biang ki wow chah thngan wei ini man i iwa sñiawkhia bha.
Hanlada i chah thngan da sangeh i ynne i janmiet, kiwa yahkhmat ka NEHUSU ynne hi da pynbna ki wow pteiñ i yakhih deiwa chong kyllaiñ myngngor haphrang ka Office u Vice Chancellor man-ka-sngi nadooh 9:00 waje i step hadooh 5:00 waje i janmiet kat hadooh wa ka Education Ministry u e kti ko ya i takit.
Chooh chooh ki khynnah da raikut ki wow dawa hiar chuki namo kyrriah kreh ya u Prof. Shukla wei wow pynjanai ya i rukom krehkaam kani ka skurbah.
Heijooh i por u Rakkam da ong u wa i chimkhia smat ka sorkar pyrdi daw wanrah biang i yei suk ha NEHU khnang wow yada ya i stat i tip kamwa jooh ha ka thaaiñ.
Discussion about this post