Kiwa yahkhmat ka JSU wa kynthup ya u Treibor R Suchen uwa man leh uwa ebuit ka JSU War Jaiñtia Circle chirup wa u Vice President ka JSU seiñbei u Aplang Lamare, ynne ka sngi da lai yachem ki ya u DMHO wa duna ki Doctor ha PHC Dawki.
U Treibor Suchen da ong u wa katni ka PHC Dawki em ko du uwi u Doctor la kamwa soo bnai wei ka PHC Dawki da duna Doctor ko hadien wa uwi na ki Doctor da kreh noh u cha kiwi tawon ki thaw.
Ka seiñ da ekti ko ya ka dorkhat ha u DMHO wow pynsñiaw yeini i duna ka PHC Dawki iwa da ktah ya ki paidbah ka thaaiñ waroh kawi.
Hadien wa yachem wa u DMHO ka seiñ da ong ko wa neiliang u DMHO da chimkhia u yeini deiwa ong wa ka sorkar katni chem chitom bha ko wow pynbiang Doctor neibhah wa duna ware ki Doctor sorkar hapoh ka jylla wei u DMHO da ong u wa daw pyrchang u wow pynbiang yeiwa emkaam ka PHC Dawki.
Neiliang u Treibor Suchen da pynsñiaw u ha u DMHO wa ka PHC Dawki ka emkaam bha ko ya ar ngut ki Doctor neibhah wa kani ka PHC man ko kawa khynñia neibhah chakri ko ym du ya ka thaaiñ Dawki wa Elaka Darrang tangwa wot kiwi ki chnong leh kamjooh.
U Suchen da kyntu u ya ka sorkar wow pynbiang bait ya ki Doctor hapoh ka PHC Dawki.
