Ka mukotduma PIL wa da yaleh hajrong u sarok NH-06 da chong bichaar biang ka ynnin ka sngi da ka Meghalaya High Court heiwa ka chnat PWD (Roads) da e jubab ko heiyatoh wa u sarok Jowai Bypass wa jrong 7.997 Km nadooh na Thadlaskein hadooh Mihmyntdu uwa da sih wot mar ya dep pynchna ini wa dep.
I daw wa sih da pyntip toh wa da pynkreh heipor wa joor slap wei da chlai um wei neidaw wa chah u lai luti ki kari wa boon chwa u yoh laad i psiang u chong skem.
Da pyntip leh wa da phah ya u Contractor wow pynchna biang ya kini ki bynta wa da sih wei da pynyoo leh wa ki dur hakhmat ka yung bichaar yeiwa da sdang pynkreh biang.
Da pynyoo leh yei dur wa da pynchna leh ya ki dooid na rood sarok kamjooh yeiwa da tih ya ki dooid.
Kamtæ ka yung bichaar da yooluti ko wow pyndep u chna smat ya uni u sarok wei wow pynchna leh ya iwon iwon iwa sih ha kini ki por wa slap.
Heiyatoh won wa u sarok na Khliehriat cha Ratacherra, ka NHAI da kdaw ko yei oor khyndaw ha Sonapur Tunnel wei uni u sarok ym pu em slem chimkti na ka PWD. Kamtæ da ong wa ini i oor khyndaw da chitom bha wow pynkhooid wei da phah bru leh rap boon yow ye u wai biang ya u sarok. Ka NHAI da ood ko leh hakhmat ka yung bichaar wa kani ka Tunnel da em ko hei thaw wa joor bha i oor khyndaw.
Kamtæ da phah ya ka NHAI wow chna da ki kynroh, u booh da ki jaar ha chrooh uni u loom lane ha ki chrooh ka Tunnel yow lait u chah ktah i lai i wan heiwa ka NHAI da ong ko wa dang pyrkhat kammon u pynchna ya kani ka Tunnel yow lait u thut i lai i wan.
Ka yung bichaar da ong ko leh wa emkaam wow pyrkhat jngai kammon wow khang syndon yei wan tooid i khyndaw chapoh ka Tunnel neibhah uni u sarok toh uwa emkaam bha u wai khlem khang yow lait u chah ktah kiwa na Assam, Tripura, Manipur wa Mizoram u chah ktah.
Ya kani ka mukotduma u chong bichaar biang ha ka 19-07-23.
