U Symbood Montri Rangbah, u Prestone Tynsong uwa pait leh ya ka ki Kaam Pohyung ka jylla hawa e yei jubab hapoh ka yung dorbar ynne yeiwa kylli u MLA ka Mawlai, u Brightstarwell Marbaniang heiyatoh wa i pynslem wow kyrriah ya ka Temporary CRPF Camp wa em ha Mawlai.
Da ong u wa ha u 2022 da chim ya ka rai wa ki 4 tylli ki Temporary Camp ki CRPF wow kyrriah ki cha kawi donhi ka thaw heiwa da booh 10 Acre i thaw ha New Shillong tangwa chwa wow ya soi soskular da em kiwa chong chnong kani ka thaw wa pynsñiaw ki yei pyrchah wa joor bha.
U Prestone da ong u wa i tieñ ya ki CRPF toh iwa da em da slem bha hei rukom pyrkhat ki bru wei hadooh katni dang neh i. Wei hap wow pynsñiawthooh wa ki CRPF toh kiwa khut da ka sorkar jylla neipor cheipor hawa emkaam wei kamwa man kattæ em ki hapoh 400 ngut kiwa pynlai da ka sorkar jylla.
Yow pynbait yeini, ka chnat Urban Affairs da booh ko 50 Acre i thaw wow e cha ki pulit ka Meghalaya yow pynman ka kam ka Meghalaya State Security Complex wei ini i tieñ ya ki CRPF ymtoh de u em ki neibhah da man ki kam ka Battalion ka jylla.
Da pynche u leh wa lada e thaw cha ki CRPF ym em mut wow e u mantre ki tangwa du kam wow e wai donhi.
Discussion about this post