U President ka Hynñiewtrep Youth Council (HYC), u Robertjune Kharjahrin da ong u wa ka seiñ kwah ko wow yoo nyngkong ya ka ‘Roster’ ka Shillong Municipal Board (SMB), deiwa kylli leh kammon da em palat 300 tam ki manyung kiwa yoh kreh ha SMB hawa ka Municipal haap ko hapoh ka Reservation Policy.
Ya ini da ong u heh ka HYC hadien i yachem wa u Symbood Montri Rangbah ka Jylla, u Prestone Tynsong, wow pyrchah ya i dawa ka Harijan Panchayat Committee (HPC) wow e salan da i thaw chwa wow mih ki na Them Metor.
Neiliang u Robert da ong u wa i kaam sorkar ymtoh iwa ye wow hiar pateiñ na u pa cha u khon wei kamtæ ter ter.
Hajong i mih ki manyung ha Them Metor hadooh 342 tylli wow dawa bhah na ka sorkar, katwa katkam ka thup yong ka Municipal em du 128 tylli, u Robert da ong u wa i e yumut ka High Level Committee ympu em ko ha rynsaan paidbah namo ‘Public Domain’, tangwa ka seiñ daw leh ko yeiwa emkaam wow paan RTI wow chem iyi wa toh sakhiat kiwa kreh sorkar wei lada ka sorkar kwah ko wow muhrieh ka seiñ man ko kawa smat wow thooh tre.
Heiyatoh wa i yachem ya u Symbood Montri Rangbah, neiliang u Robert da ong u wa u Prestone da pyntip u wa ka sorkar da kyntait ko ya kiwa boon ki dawa ka HPC wei ka sorkar da pynkhreh ko katni wow e thaw sah chipor næ ‘Quarter’.
Da pyntip u leh wa neiliang ka seiñ da dawa ko wa toh wow e Quarter leh du ya kiwa kreh sorkar ym ya kiwa sah pyrchah aiñ, neibhah lada e thaw ya kiwi daw pynchlur i ya kiwa chong chnong pyrchah aiñ.
