Ka Youth Wing ka Jaintia Coal Miner’s & Dealers Association da thoh ko cha u Chief Secretary ka jylla heiyatoh wa i dai lilam wei i chalan tooh ya u mooyong deiwa ong wa sñiawkhia ki yei chalan tooh ya u mooyong iwa da jia lyngba ka Ri-Bhoi wa East Jaiñtia Hills District wei yeini da chem leh du nei mih khubor na i por cha i por.
Kamtæ da pynsñiaw ki yei pyrchah wa joor yei chalan tooh ya u mooyong hapoh ka jylla iwa da ktah ya kiwa boon ki liang wei ka sorkar toh u chim ko ki laad ki luti wow khang ya ini hanla ka sorkar ym bien ko u ngait wa em i chalan tooh ya u mooyong tangwa ki kiwa em ha i thaw tip ware ki yei sakhiat wei sñiawthooh ki yeiwa man.
Ka Association da ong ko wa ym ye ki wow sñiawthooh wa kammon ya u mooyong da ye wow chalan tooh cha Assam nalor wa em boon tylli ki Police Check Post, ki DMR Check gate, ki District Council Gate wa kiwi kiwi ki Check Gate. Kamtæ da ong wa ini pynyoo ko wa emkti wei da ya krehlang ki bru sorkar wa kiwa khayi mooyong pyrchah yaka aiñ neibhah ym ye wow man wow yohlaad u chalan tooh ya u mooyong khlem da ya emkti ki bru sorkar. Da kdaw wa du hapoh ri loom Jaiñtia da em kamwa 9 tylli ki Police Check Point, kamwa 4 tylli ki Weighbridge, 2 tylli ki DMR Check Point, 2 tylli ki District Council Check Point, ki Check Point yong ka Transport Department wa boon tylli ki Check Point yong ka Forest Department kamtæ da man ko iwa eh wow chalan tooh lada ym em krehkaam lang kini ki Check Point wa kiwa chalan tooh ya u mooyong.
Da ong leh wa kiwa khayi mooyong da pynlut ki hadooh T.1 lak yow ye u chalan tooh ya u mooyong cha Assam. Kamtæ ini da man ko i dooh nong yaka sorkar tangwa da em won ki bru kiwa yoh da ki lak ki klur na ini i khayi tooh iwa boon dooh na East Jaiñtia Hills District cha Assam.
“Yow pynsakhiat yei lai i wan ki truck wa kit mooyong, ye du wow pait ya iwa da riñ ki CCTV ha ki Toll Gate nadooh na Ratacherra chadooh Byrnihaat”, da ong ka Association haka chithi deiwa sñiawkhia leh yei em ki truck kiwa kit pyrchah yaka aiñ kiwa chah kem tangwa da pynlait yaki hadien wa su poisa ki.
Ka seiñ da kdaw ko leh wa da em 19000 MT u mooyong uwa chah kem uwa da dep wow dai lilam da u Deputy Commissioner, East Jaiñtia Hills District ha kini ki bnai wa da dep, wei da e leh yaka Transport Challan yow kit ya u moo wei ya kani ym toh wow dai cha ki kiwon kiwon lait noh ya u mooyong wa da dep wow dai lilam tangwa ya kani ka Challan da dai cha ki bru samen kiwa khayi mooyong kawa da sdang wow dai T. 80, 000 neibynta wow kit ya u mooyong wa 12 MT wei ini i dor ka Challan ye ko wow ku chadooh T. 2 lak kawi ka Challan iwa chong hei boon u mooyong, wei ka sorkar ya ini ym em leh ko iyi iyi leh.
Kamtæ da ong wa ka sorkar ym toh wow leh ko kam kawa ym yoo ya kini ki kaam pyrchah yaka aiñ khamtam i kit ya u mooyong pyrchah yaka aiñ lyngba Umkiang-Ratacherra (EJH) wa ha Byrnihaat (Ri Bhoi) toh u pynsangeh chisyndon neibynta i bha i miat ka jylla. Ki pulit leh ym toh wow leh ki kamwa ym yoo ya ini iwa da ktah yei yoh i kot ka jylla.
Da pynkut deiwa ong sñiawsih wow yoo wa em ki kattu katni kiwa ym kwah de wow sdang biang i khih mooyong wei kwah ki wow pteiñ wow roi kini ki kaam wa man pyrchah yaka aiñ, kamtæ ka Youth Wing da ngooh ko yaka sorkar wow khang syndon ya waroh kini ki kaam pyrchah yaka aiñ wei wow chah u sdang noh ya i tih mooyong wa katkam ka aiñ wa da booh da ka sorkar.
