Shillong: Ka Synjuk ki Khlieh Nong Synshar ka Sohra Civil Sub-Division deilang wa u MDC ka Sohra, u Titosstarwell Chyne ynne ka sngi da lai ki wow yachem wa u Montri Rangbah, u Conrad K Sangma hajrong i hiar i yoh i kot ha ka thaaiñ waroh kawi, khamtam hadien wa wa khang ya i tih mooyong.
U Chyne uwa man leh u CEM ka KHADC, da pyntip u wa neiliang u Montri Rangbah da pyntip u wa hadien wa da pynmih hukum ka Supreme Court, ka sorkar da chah ko ya ki tre paar wow yaleh ya ka Mining Lease. U MDC da ong u wa ini i rukom tih ya u mooyong toh kawa thymme wei emkaam wow e sikai ya kiwa khayi, wei da pyntip u leh wa neiliang u Montri Rangbah da kular u wow booh ya kawi ka thaw e sikai ya kiwa tih mooyong kiwa em ha ka thaaiñ Sohra.
Hawa yatoh wa ki kaam uiñke suwari, da pyntip u wa neiliang u Montri Rangbah da kular u wa i pynlut wa boon yong ka sorkar ha ki snem wow wan daw man ko cha ka chnat Tourism neibhah ka poisa em ko hadooh T.700 klur wow pynlut ha ka thaaiñ Sohra.
U MDC da pyntip u wa u Montri Rangbah da pyntip u wa ya ka sarok na Umtyngar cha Sohra da dep wow mang ya ka poisa thymme wei ha i jooh i por da em leh ki Project wow kyntu ya ki kaam uiñ suwari deiwa daw chna leh ya ka ‘Heritage Village’ ha Sohra, u chna ya kawi ka yingkieñ lai kjat na Mawkdok cha ka chnong Swer wa kiwi kiwi deiwa kular wow pynku ya ki thaw wa rap cha kdong.
U Titos da pyntip u leh wa ka synjuk da yaklam ko wa u Montri Rangbah hajrong i eh yong ka MCCL, deiwa pyntip wa neiliang ki khlieh wa synchaar dang kwah ki wow yoo wa ka MCCL u yieñ ko neibynta i myntoi ki paidbah, wei hajrong ini daw em biang i yachem wow yaklam hajrong ini i kaam.
Hawa yatoh won wa i eh ki wakreh khamtam wow su ya ka tulop wa dang sah ki wakreh, da pyntip u wa u Conrad da kular u wa ka sorkar da chimkhia ko ya ini i kaam yow ye u su noh ya ka tulop hachwa ka Christmas.
