Wa joor chrai kiwa kreh ka Congress, myntu ka tayaaw u dam noh ki 2 ngut ki MDC nei kyrchaan NPP

I pynbor ya ki MDC ka Congress wow mih noh na ka Executive Committee wa yahkhmat da ka NPP da man ko iwa joor bha. Katkam ka khubor wa tikna na kiwa yahkhmat wa kiwa kreh yong ka Congress, ini i pynbor ya ki MDC wow dam noh nei ya krehlang wa ka NPP da sdang nadooh ka 20 tarik u Naikhynde uni u snem ha ka General Meeting yong ka Congress kawa da pynman ha ka Congress Bhavan.

Ka khubor wa da tikna da ong ko leh wa kani ka yalang dadep rai wow dam noh yei ya krehlang wa ka NPP ha KHADC wei da chaniah ha kiwa yahkhmat ka Party wa kynthup ya u P.N. Syiem wa u R.V. Lyngdoh.

Da khana leh wa i pynslem yong kini ki arngut ki MDC wow mih na ka Executive Committee da pynchrai ko ya kiwa boon kiwa kreh ka Congress wei ha ka 26 tarik u Khonchonglad (Nov), ki President yong ki District Congress Committee da thoh ki cha u Secretary ka AICC In-charge Meghalaya wow tuklar hajrong ini i kaam.

Neidaw wa chrai kiwa kreh ka Congress, u Dr. Chella Kumar wan man u Secretary ka AICC wa u Anthony Matthew, Joint Secretary ka AICC kiwa toh u pait ya ka Meghalaya, da wan hi ki da idæ wow yachem wa kiwa yahkhmat deilang ki dkhot yong ka Party ha ka 2 tarik uni u bnai, wei ha ini i wan, da yachem ki wa kiwa yahkhmat wa ki dkhot yong ka Congress nadooh ki Block Congress Committee, District Congress Committee wa ka Meghalaya Pradesh Congress Committee.

Related posts

Lai ood ki MDC ka VPP ha ka sorkar wym yoh Scheme sorkar pyrdi ha ki Constituency wa em ha sor

May 13, 2025

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Ka khubor wa da yoh da sñiawthooh wa ha kani ka yalang, kiwa kreh yong ka Congress da pynbor ki ya ki In-charge wow tuklar smat noh ya kani ka kaam, wei ini pynbor kiwa kreh ka Congress da booh i ya u P.N. Syiem wa R.V. Lyngdoh hei eh, wei deiwa wan yong ki In-charge da pynman ya u P.N. Syiem wa u R.V. Lyngdoh kiwa man ki MDC wow pyrkhat bniah biang hajrong i ya krehlang ha ka Executive Committee yong ka NPP wei lada ym chim ki yei rai rap smat, daw nang booh chooh chooh hei eh ya kini ki ar ngut khamtam ya u P.N. Syiem u wow yakhun ya ka Election MDC na ka seiñ Congress.

Katkam ka khubor wa da tikna bha, kini ki arngut ki MDC ym yohsa khlem wow ap yei dawa kiwa kyrchaan wa kiwa kreh ka Congress, wei da yoh khubor wa da mih noh na ka Executive Committee wa yakhmat da ka NPP myntu ka tayaaw.