Heiyatoh waka mukotduma wa da leh hi da ka Meghalaya High Court hadien wa mih khubor wa em i tih mooyong pyrchah ya ka aiñ ha thaaiñ Shallang, West Khasi Hills iwa da mih pyrthai hadien wa ujor FIR ka Nokma ka Nengchigen, ka Kristina G Marak heiwa ka yung bichaar leh da phah ko ya ka Chief Secretary deilang waka DGP ka jylla wow lai takit wei wow phah ya ka bui hapoh 7 sngi heiwa ha ka FIR da pynbaad leh wa da emkti lang ki pulit heini i tih mooyong pyrchah ya ka aiñ.
Ynne ka sngi ka yung bichaar hapoh i bichaar u Justice Sanjib Banerjee, Chief Justice wa u Justice W. Diengdoh da pynmih hukum wa ya kani ka kaam u chong bichaar da ka miej wa pura namo ka Full Bench kiwa bichaar (Judge) ka Meghalaya High Court.
Da ong wa i ini i kaam toh iwa khia wei iwa emkaam bha neibhah da em ka hukum ka National Green Tribunal (NGT) kawa da mynjur leh da Supreme Court heiwa ym em bood ya ka.
Kamtæ katkam ka Article 144 ka riti synchaar ka ri India da toh i kaamram yong waroh wow pynkrehkaam ya ka hukum wei da yoo leh yei wym ye ka jylla wow leh yeiwa toh u leh ko katkam wa da mih ki khubor wa em i tih mooyong pyrchah ya ka aiñ.
Ka yung bichaar da ong ko wa ini da pynyoo ko leh wa iwa da phah leh daka Committee wa da thung da ka NGT ym em leh ya ki katkam i por wa da booh kamjooh chiboon iwa da phah da ka hukum ka Supreme Court kawa da pynmih ha ka 03-07-19 deilang wa kiwi de kiwa da phah da ka NGT hadien ini leh ym em bood ya ki.
Kamtæ da yung bichaar da chimkhia ko ya ini i tih mooyong pyrchah ya ka aiñ iwa da mih ha kiwa boon ki thaw hapoh ka jylla kiwa khlem da yoh bor, khlem yoh License hapoh ki aiñ wa da kdaw da ka Supreme Court hapoh ka hukum wa da pynmih ha ka 03-07-19.
Kamtæ yeini i kaam daw chong bichaar daka Full Bench ha ka 7 tarik uni u bnai.
Puræ leh: Hapoh 7 sngi u e jubab ka sorkar cha ka HC hajrong i tih mooyong pyrchah ya ka aiñ
