Ynnin ka sngi u montri ka sorkar jylla wa pait ya ka chnat Forests and Environment ka sorkar jylla, u James K. Sangma da yachem u ya ki le ngut ki bru napoh ka jylla kiwa embynta bha ha i yakhun wow yada ya ka rymaw kiwa kynthup ya u Naba Bhattacharjee, Morningstar Khongthaw wa u Nicholas J Kharnami wow yaklam hajrong kammon wow pynkhlan ya i poor ki khloo, wow yada ya ka rymaw wa kamjooh leh wow yakhun pyrchah ya i kylla i suiñ bneiñ (Climate Chnage) ha ka jylla Meghalaya.
Katkam ka yutip wa da yoh u Wyrta, uwi na ki bru wa da kreh bha ha i kaam wow yada ya ka rymaw na Ri-loom Jaiñtia, u HH Mohrmen hadien wa chah khut sñiawbha cha kani ka yalang da kyntait u wow embynta ha ka.
Katkam ka email wa da yoh u Mohrmen ha ka 2 tarik uni u bnai da khut sñiawbha ya oo wow yachem wa u James Sangma hei wow yaklam hajrong ka phang Forest, Environment & Climate Change heiwa daw chim ya i buit i budia neibhah wa ka sorkar jylla dang pynkhreh ko ya ka Policy hajrong kani ka phang.
Hawa yaklam wa u Mohrmen wow tip ya i daw wa kyntait u wow chimbynta ha ka yalang, da ong u wa kani ka sorkar ym em u chimkhia ko wow pynneh pynsah ya ka rymaw kamwa da klam da kular ko.
Da ong u wa nachwa da em i pynbaad wa em i chalan wa i tih tooh ya u mooyong wei yeini da len ki montri ha ka sorkar tangwa du hadien kattu katni por da chemdien ya ki kaam wa pynsakhiat wa joor bha ini i kaam iwa man pyrchah ya ka aiñ iwa da ktah ym du ya ka rymaw tangwa wot ya ka yarong poisa ka jylla waroh kawi.
Da kdaw u leh heiyatoh wa i yoh Environmental Clearance (EC) ka karkhana pynmih khyndawbilat ka Star Cement wow tih moochuni na Brichyrnot heiwa nyngkong da leh ka sorkar wa ki montri kam kiwa ymtip kammon yoh kani ka karkhana ya ka EC tangwa du hadien kattu katni tayaw da chem wa u montri rangbah hi ka jylla uwa da thoh cha Delhi kam ka dak wow ebor ya ki wow e ya ka EC iwa da pyntlotbor chooh ya ka jylla.
Chooh chooh da ong u wa kani ka sorkar wa ki sorkar warim ha ka jylla man ko kawa atsatia bha neibhah wa klam ki wow pynneh pynsah ya ka rymaw du wow pynbiej paidbah donhi dei langær tangwa ki kaam won ym yoo tang kajiak wow kyrchaan yei klam yong ka.
Heijooh i por da kdaw u leh ya ka Mining Policy ya kawa katni da booh mylliñ ya ka cha kdong.
Wot ha ka Facebook neiliang u Mohrmen da thoh u deiwa Tag ya u montri rangbah ka jylla u Conrad Sangma wa u James Sangma deiwa ong wa da kylla ktien ka sorkar la ha ka CAA wot ha ka EC wa yoh ka karkhana khyndaw bilat wow tih moochuni.
Da thoh u wa kam u manpa kammon u jubab ya ki khon manda kylli ki iyi leh phi wow yada ya ka Narpuh Wildlife Sanctuary? Wei hajrong kini kiyi kiyi waroh da kyrpaad u ya u Conrad Sangma wa u James Sangma wa ymtoh de u khut ki ya oo (Mohrmen) wow embynta ha i kaam wow yada ya ka rymaw.
