Ka Khasi Students’ Union (KSU) Huroi Unit da dawa ko na ka sorkar wa na ki bor District wow kyrriah noh syndon ya ki Border Security Force (BSF) kiwa chong ha ka yingkieñ Sonapyrdi ha laad yong u sarok wow lait cha ki chnong khappood Lejri, Lahaleiñ, Huroi wa Hingaria neidaw wa da leh embor ki cha palat ya ki paidbah wa lai wa wan ha kani ka thaaiñ.
Ka seiñ da ong ko wa kini ki BSF da em ki ha ini i thaw pyrchah ya ka aiñ wei ha u snem 2020 da dat pynmynsoo ki ya uwi u bru na ka chnong Huroi uwa tip pyrtuid kam u Dibus Ksiar deiwa kyrtem ya oo na rupai wei ha kini ki kajiak sngi da pynhær rngu ki ya ki bru wa lai wa wan nadooh kiwa chong kari wa kiwa yah kari khamtam ya ki kynthai nei leh bru khloo, leh embor cha wa palat kini ki chipai.
Chooh chooh ka seiñ da ong ko wa ini ymtoh i sien wa nyngkong wa da dawa ko yeini tangwa na ki daw wym tip ym em leh ka sorkar iyi iyi leh wei lada ym leh ki iyi iyi, ka seiñ ym yohsa ko wow chim da kiwi ki laad ki luti wow pynyoo yei bor ya kini kiwa pynthut yei lai i wan ki paradoh parasnaam.
Ka seiñ da khana ko leh wa dang ha kini ki kajiak sngi da em uwi u khynnah skur na ka chnong Huroi uwa lai skur ha Nongtalang, West Jaiñtia da chah tba kti u ha ki BSF, kamtæ da ong wa ileh da booh ya ki BSF ha ki thaw wym em ha khappood wei da toh por wow kyrriah noh ya kini ki BSF.
