Da ki spah ngut ki khynnah na Nagaland kiwa puræ ha Kaziranga University, Assam kiwa em 371 ngut da liwan yung ki hadien wa mih i awri hapoh kani ka skurbah nei klam khlemakor uwi u khynnah Naga ya u Zubeen Garg ha i miet ka 20 tarik uni u bnai.
Katkam ka khubor wa da yoh, da ong u wa ha i sngi wa jia ini, uni u khynnah wa puræ B.Tech Civil Engineering uwa tip kam u Lisseri S. Sangtam da liwan u cha Hostel hadien wa lai u cha sorbah Jorhat tangwa nei chrai yei wym yoh kari u da klam khlemakor u kamni ha ki lok u yeiwa da riñ Video wei da pynpoor ha ki Social Media, wei ini da pynchrai i ya ki khynnah kamjooh kiwa na baar ka skurbah wow awri ki.
Da em leh ki bru paidbah na lait ka skurbah kiwa da wan psiah yabor wow awri ha ka Boys Hostel tangwa nei wan smat ki bor pulit da ye u pynsuki ya ki.
Ya uni u khynnah da pynchitom deiwa Suspend ya oo wei oo leh da paan maap u yeiwa da klam u.
Neiliang ka skurbah da ong ko leh wa em da ki spah ngut ki khynnah na Nagaland kiwa da kyrpaad wow liwan yung chwa kattu katni tayaaw.
U Montri ka jylla Nagaland, u Temjen Imna Along da beiñ joor u yei klam khlemakor uni u khynnah deiwa ong leh wa u Zubeen ym du u khloor ka Assam tangwa ka thaaiñ chaneiñ mihsngi hi waroh kawi.
Chooh chooh da ong u wa da chngaaiñ i man i long ha kani ka University ha Jorhat, Assam deiwa e khublei ya ka sorkar wa da chimkhia ko yeini iwa jia.
Discussion about this post