Shillong: Ka KSU War Jaiñtia Circle ynne ka sngi da dawa ko na ka sorkar jylla wow pynsmat u booh ya ka ktem pulit ha ka thaaiñ Muktapur wow yada ya ki paidbah wa sah ha khappood hadien wa chong syir ki ha kini ki sngi nei wan psiah ki damok na Bangladesh.
Ynne ka sngi ka seiñ hapoh i yahkhmat u Laitphar Syngkrem da yachem ki ya u DIG Eastern Range u MK Dkhar wow pynsñiaw yeini.
U Laitphar da ong u wa neiliang u DIG da kular u wow rah yeini cha u montri rangbah kamwa da pynsñiaw ka seiñ.
Heijooh i por ka KSU beiñ ko yei kom ki chipai BSF kiwa da man kam kiwa paitke donhi ya ki dkhar na Bangladesh hawa wan psiah ki chapoh India.
Da maham u leh ya ki bru wa mlien wow man kam ki bru-poh wow wanrah ya ki damok na Bangladesh.
Da pynbaad u wa dang ini kamwa 7 ngut ki bru na Bangladesh da chah ksoh ki wei da yah ya ki da uwi u bru na Assam ya uwa tip kam u Suman Bishnav uwa man kam u Agent.
Chooh chooh da ong wa ha ki thaaiñ khappood em ki hei chong syir mynsien katni hadien wa ki damok na Bangladesh da yoh ki wow ku khamtam heipor miet wow leh ya ki kaam pyrchah aiñ.
Discussion about this post