Hadien wa ku ware i dor yong i phñiang kari (Petrol/Diesel) wa da kynjoh palat T. 100 iwa da ktah bha ya ki paidbah, ynne ka sngi ka Hynñiewtrep National Council (HYC) Jaiñtia Hills da pynman yakhih ko deiwa kdoh lama rong yong ya ki kari wei deiwa rah ya ki Banner wa thoh ya ki kyntien wow beiñ ya ka sorkar jylla.
Ya ini i yakhih da pynman ha Soolaad ka Laad Kiang Nangbah Govt. College, Jowai.
U Yoodahunki Shylla uwa man kam u President ka HYC-War Jaiñtia da ong u wa i leh ka sorkar wow chim palat ya i dor wa T. 55 hapyrdi ka sorkar jylla wa ka sorkar pyrdi da pynman yei phñiang wow syad dor i, da beiñ u leh ya ka sorkar jylla kawa da pynjoor du i lai booh mooyurim, da dawa u leh na ka sorkar wow pynsangeh noh ya ki Committee waphær waphær neibhah kitai ki Committee ym poi ki cheiwon cheiwon leh.
Da kyntu u ya ka sorkar wow pyrkhat ya ini neibhah i ku dor i bai phñiang da ktah i ya i dor ki mar baam ki paidbah.
Neiliang u General Secretary ka HYC Jaiñtia Hill District Unit u Roamingstar Lamare da pyntip u wa hadien wa rai ka Central Executive Committee ka HYC na Shillong, kamtæ da pynman yakhih ha kylleiñ ki District Headquarter ka jylla.
Da beiñ u leh ya ka sorkar wa ymtoh u pynman blang kñia ya ki paidbah khamtam kiwa dooh.
Chooh chooh da klam che u wa lada ka sorkar ym ap ko yei dawa wow pynhiar ya ka dan na i phñiang kari ka seiñ daw pynman ko da kiwi ki jait yakhih wa rap khor.
