Ynnin i miet ha i por kamwa 9 waje, da mih i kulmar hapyrdi ki pulit CRPF wa ki paidbah ha ka chnong Mawlai ha Mawlai Nongkwar Block 8 kawa em ha u sarokbah Shillong, wei ha ini i jia ki CRP da bom pathar ki ya ki bru wa kynthup ya uwi uwa yah ya ka kari wa da pynemkaam da ka yung krehkaam ka kotkhubor Mawphor.
Ha ini i kulmar da mih i ya kawang moo markylliang hapyrdi ki paidbah wa ki CRPF kiwa em ha katai ka thaw, wei ini i jia kynaad da neh slem bha wei da sdang wow poor leh chadooh Mawlai Petrol Pump wa cha Iewrynghep da i tooid ki khynroo ki chnong wa i mih ki paidbah, wei da sakhi leh ya ka pakhang ya ki sarok da ki moo wei da thang leh da i diñ hapyrdi sarok wot hadien wa ka sorkar da pynkrehkaam ko ya ka Curfew nadooh i por 8 waje i miet.
Hadien yong ini i jia, ynne ka sngi da mih i dawa na kiwa chong chnong ka Mawlai wa toh wow kyrriah noh ya katai ka ktem ki CRPF na katai ka thaw, wei ya ini i dawa da kyrchaan leh da uwa mihkhmta ka Mawlai, u Process T Sawkmie uwa da hiar wow lai pait ya katai ka thaw ynne ka sngi.
Hawa klam hajrong itai i jia, u Montri Rangbah ka jylla, u Conrad Kongal Sangma da ong u wa hadooh kattæ ym pu yoh yutip wa bniah hajrong itai i kynaad, tangwa da ong u wa ka sorkar ym kwah ko wow mih kam itai i jia khamtam wa ki bru na ki laad pathai khubor u chah thombor ki.
Ha iwi i liang, da ong wa ka sorkar da yatai sani bha hajrong i dawa wow pyndam noh ya ka ktem CRPF na katai ka thaw, wei da rai wa ka Deputy Commissioner deilang wa kiwa mihkhmat wa kynthup ya u MLA wa MDC, kiwa yahkhmat chnong wow yatai ki kammon wow leh hajrong ini i bynta.
Da ong u wa i em ki bor wow pahara ha katai ka thaw man ko kawa emkaam neibynta i chngaaiñ ki paidbah, deiwa pynrap leh wa hadien wa pynbait lang wa waroh kiwa embynta yong ka chnong Mawlai, ka DC deilang wa ka chnat Kam Pohyung, du hadien ini daw pait kammon wow leh na i bynta i bha i miat waroh arliang, la man ko hajrong i pynthut wa man-i-por ki CRPF wa kamjooh i emkaam won ki bor pahara.
