Ka Hynniewtrep Youth Council (HYC) ynne ka sngi da lai ko wow paan pynche na ka Medical Superintendent (MS) ka Ganesh Das Govt. M&CH Hospital, Shillong hadien wa tip yei dor i bai sumaar khonboo hapoh ka Neo Natal Intensive Care Unit.
Ya i dor da pynbha ha ka 5 tarik uni u bnai da ka Internal Management Committee kawa toh u pait wei pynlai ya kani ka Hospital ha ka yung thymme wa em ka Neo Natal Intensive Care Unit.
Hawa klam wa kiwa thoh khubor, u President ka HYC, u Roykupar Synrem da khana u wa ka seiñ da yoh ujor ko na ki paidbah hawa yatoh wa i dor thymme neibynta wow sumaar ya ki khonboo khamtam ya kiwa dang dep kha.
Da ong u wa ini i pynmih yei dor thymme man ko Rs. 1500 chi miet neibynta wow sumaar ya ki khonboo wa dang kha deiwa booh ha ki Ventilator yow e Oxygen, u Central Line yow pyndait e dawai wa kiwi kiwi de.
Da ong u wa ini i lai yong ka HYC toh neidaw wa ki bru wa duna hei yoh i kot na kylleiñ ka jylla wan ki wow phah sumaar ha kani ka Hospital ya ki khonboo tangwa ini i dor thymme daw booh ko hei eh ya ki bru.
U Roykupar da khana u wa ha i yaklam wa ka MS, da kular ko wa ka Hospital daw booh ko da ka MHIS Cell yow pynpsiah wei pynyabi waka MHIS Card khnang wow yarap ya kiwa chah sumaar, wei lada em ki paidbah ki wym em MHIS Card, ka MS da kular ko wow pynlait ya ka bai sumaar lada kiwa kjut wanrah ki ya ki BPL Card, Ration Card wa da iwa thoh da ki waheh chnong yow pynsakhiat wa wan ki na ki manyung wa duna i yoh ka kot.
Discussion about this post