U MLA ka liang pyrchah, u Zenith Sangma ynne ka sngi hapoh ka yung dorbar da wanrah u ya ka Zero Hour Notice hajrong i pynbna kyrtong ka NPP na North Shillong da u sahep sorkar uwa dang kreh hapoh ka sorkar.
U Zenith da ong u wa u Dr. W.R. Kharlukkhi, MP ha ka yalang ka NPP da pynbna u ya u Ransom Sutnga uwa dang man katni kam u EE PWD (B) wow man u kam u kyrtong ka NPP na North Shillong heiwa ini da man ko pyrchah ya ka Meghalaya Service Conduct Rule 2019.
Chooh chooh u Zenith da kdaw u wa hapoh kani ka Service Rule da khang ya uwon uwon u wakreh sorkar wow psiah man dkhot hapoh kawon kawon ka seiñ saiñhima katwa uni u bru da lai chimbynta u leh ha kiwa boon ki yalang ki seiñ saiñhima heipor wa katni dang man u kam u wakreh sorkar heiwa ym em leh ieh u yei kaam yong oo.
Kamtæ da ong u wa lada chah u leh yeini daw booh nongmuna ko kawa sih kawa daw chim kabu ki bru khamtam kiwa kreh sorkar heiwa daw leh chilliang ki yei kaam wei da emkaam wow pynchitom ya uni u bru wei ya ki paidbah leh yow tip ki wa ym chah ka aiñ wow leh yeini.
Hawa e yei jubab hajrong ini, neiliang u Symbood Montri Rangbah ka jylla, u Prestone Tynsong da ong u wa da phah ya ka Explanation Notice yow paan pynche yeini waroh wei daw pynchitom katkam ki kyndon ka Service Rule.
