Heiyatoh waka RTI wa da jubab ka Central Pollution Control Board wa ym pu em pynemkaam ya ka T. 100 klur wa da phah da ka sorkar Meghalaya napoh ka Meghalaya Environment Protection & Restoration Fund (MEPRF) yow pynim ya ki thaw wa da chah ktah nei tih mar pohkhyndaw katkam ka hukum ka NGT wa da pynkylla da ka Supreme Court ha u 2019.
Hawa kylli hajrong ini na u Montri Rangbah ka jylla u Conrad Sangma ynne ka sngi, da ong u wa ka Central Pollution Board ym emkti ko ha ini i kaam wei yeini toh iwa pait da ka chnat tih mar pohkhyndaw ka jylla.
Wei ka poisa leh toh kawa da em waka sorkar wei da em ko palat T. 100 klur tangwa em ki kyndon wa hap wow bood hawa pynkrehkaam ya ka heiwa ka NGT da booh ko da ki kyndon wa rkhiñ bha kammon wow pynemkaam ya kani ka poisa neibhah ym ye wow pynemkaam ya kani ka poisa ya kiwi won ki jait kaam lait nawa da dep phah chwa da ka NGT.
Kamtæ da ong u wa ya ini da chimpor bha ya ka sorkar wow leh ko wei da sdang pynkhreh ya ini i kaam wei da yooluti u wa ha kini ki bnai daw sdang leh ya ki kattu katni ki kaam (Pilot Projects) wei da yoh leh yei jubab wa biang naka NGT wei mar ya yoh yei mynjur daw sdang noh.
Puræ leh: Sah ka T. 100 klur khlem pynemkaam wow pynim ya iwa da chah ktah nei tih mar pohkhyndaw
