Shillong: U Myntri ka chnat Public Health Engineering (PHE) ka sorkar jylla, u Samlin Malngiang da ong u wa i chim por wow pynlai chakhmat ya ka Jaal Jeevan Mission (JJM)), ka Project pynyoh um baam cha ki nongkyndong hadooh tyngkong yung, toh neidaw wa hap u bood ryntih bha ya ki kyndon kiwa da prooid dak.
Katkam wa pyntip u Montri, ha u bnai Kmaichonglad (Dec), 2019 doh ya iwa phah wei du kattu katni i por wan sa ka khlam COVID-19 wa sa iwi won i daw toh neidaw wa slem u poi ki Pipe um, tangwa katni won ka chnat da lai ko chakhmat wow pynkrehkaam yaka JJM, deiwa ong leh wa i thong pynkrehkaam man ko kawa heh bha.
Da ong u leh wa i pynkrehkaam ya katai ka Project ym ye wow lai lait na ki kyndon wei hap wow ya krehlang waki Village Water Sanitation Committee, heiwa da pyntip u leh wa ka jylla Meghalaya da yoh ko T. 175 klur na ka JJM neibynta u snem 2020-2021.
Kam wow kdaw heini wa ha uni u Naiynru ka sorkar pyrdi da pynsñiaw ko yei sñiawkhia hajrong i slem wow pynkrehkaam yaka Jal Jeevan Mission (JJM) ha Meghalaya, heiwa u Montri ka chnat Jal Shakti ka sorkar pyrdi, u Gajendra Singh Shekhawat da phah u leh dei thoh cha u Montri Rangbah ka jylla u Conrad K Sangma hajrong ini slem palat u pynkrehkaam yaka JJM.
