Neidaw wa i drugs iwa da man kam uwa choon wei pynjæd pynpra ya ki manyung wa ka imlang sahlang uwa da sdang joor i roi ha ka chnong Rymbai, East Jaiñtia Hills District, kamtæ ka Jingiaseng Samla Balang Presbyterian Rymbai dei sñiawkhia wei dei wym yohsa dæ, mih ko chakhmat neibynta u pynsñiawthooh paidbah hapoh ka chnong ka thaw hajrong uni u jait dih wa sih neibhah boon na kiwa chong chnong da chah kdoh chah khoom ki ha uni u jait dih.
Ha ini i pynsñiawthooh paidbah da wan emlang leh u Montri ka sorkar jylla, u Kyrmen Shylla kam u kongsan, u DC ka East Jaiñtia Hills District, u Shivansh Awasthi kam u symbood kongsan, ki manbei manpa, ki khynnah skur wa ki bru chemphang na ka chnat pulit, chnat Social Welfare, DM&HO, na ka Break Through De-Addiction & Rehabilitation Centre KJP Synod Mihngi wa kiwi kiwa da e i pynche hajrong kammon ki bru chah æiñ ki hei drugs wei kammon pynsih u ya uwa pynemkaam neitæ ya ka yung ka sem waka imlang sahlang waroh kawi.
Neiliang ki khon khynroo khyllood ka Balang Presbyterian Rymbai da chim ki ka bynta u pynche pynsñiawthooh lyngba ka drama tbian wa kamjooh i rwai wa chongkhia wa sñiaw lung, deiwa khut ki leh ya ki khon ka chnong kiwa da ngop hei drugs wow kylla wamut noh ki.
U Kyrmen Shylla hawa klam kam u kongsan pynsñiaw u i diaw neibhah wa ka East Jaiñtia Hills District toh kawa boon dooh ki bru wa dih drugs. Kamtæ khut lang u ya waroh wow yieñ yaleh pyrchah yei drugs deiwa sdang na myntu ymtoh wow boohteiñ neibhah ka mynstep ym tikna.
Neitæ kyntu u wow jied yei im yong idæ ymtoh u chah pynbiej hei pynchoi wa boonjait wa wan, wei iwa kongsan tam ong u toh u kohngooh yei sneiñ i kyntu kiwa ha-yung ha-sem.
Khana haroh u wa oo leh da lait salit u heipor wa dang puræ neiwa em u lok u uwa ngop ha uni u jait dih.
Hei im kam ki bru em boon i yaleh wei ymtoh u chim da i drugs heipor wa tyngkhooh yei eh neibhah uni nang wanrah u boon chah chooh chooh i jinjar.
Neiliang u symbood kongsan, u Deputy Commissioner ong u heiwa sdang hi ki bru yoh maad drugs ki na ki bru kiwa tipmit hi ki la ha skur ha ki thaw puræ næ ki thaw waphær waphær wei heiwa sdang hi u phon ki deiwa e mynkna, hadien wa da sdang kyrni wei wym ye de ki u ieh sdang noh ki u paan poisa.
Booh u leh i kyntu wow rah ya kani ka Wyrta kylleiñ kylleiñ khamtam ha ki khynnah skur wa joor i maa nei khlan yachem lok thymme.
Discussion about this post