Khliehriat: Ka Khasi Students Union-Jaiñtia Hills District Unit da pynsñiaw ko yei sñiawkhia yei pynslem ka sorkar jylla wow yoh thaw neibynta wow pynyieñ yaka khyrdop psiah wei mih (Entry & Exit Points) kawa em ha Malidor East Jaiñtia Hills.
Hawa booddien ya ini, ka KSU ynne ka sngi da lai yachem ko ya u Deputy Commissioner ka East Jaiñtia Hills u FM Dopth yow thooh yutip yei lai kani ka kaam wow booh yaka khyrdop ha katai ka thaw.
Hawa yaklam wa u DC da ong u wa da em ka thaw wa heh hadooh 60000 Sq.Ft. tangwa i daw wa pynslem wow chimkti ya katai ka thaw toh neidaw wa syad palat i dor wa da poi palat 2 klur tyngka.
Hawa yatoh waka District Task Force won da ong u wa kani daw krehkaam ko hadein wa dep chna yaka Entry & Exit Points.
U DC da e yumut u leh yaki dkhot ka seiñ wow lai yachem wa u Director ka chnat Tourism neidaw wa ka Nodal Office toh kawa pait neibynta wow thied yaka thaw wow pynyieñ yaka khyrdop.
“Da boonsien i da wan booddien i ya kani ka kaam, tangwa da chem ya i jooh bait i eh wa ym yoh poisa wow thied thaw,” da ong u SS Niangti, Finance Secretary ka KSU-JHDU.
“Mynstep ka sngi man ko kawa khaddooh wa ka Assam u pynmih khaddooh ko yaka Final Draft yong ka NRC, khlemdam daw em i psiah tooh ki baar jylla cha ka ka yylla ngi,” da ong chooh chooh u.
Ka seiñ da kyntu ko yaka sorkar wow pynsmat wut wut yaka kaam chakhmat khlem pynslem khnang wa i psiah i mih yong ki baar jylla ym man ko kawa laitlan palat.
Discussion about this post