Shillong: U Montri ka sorkar pyrdi, u Sanjeev Kumar Balyan da kular u ya ki heh ka Confederation of Meghalaya Social Organisation (CoMSO), wow rah ya ka phang dawa Inner Line Permit (ILP) ka jylla Meghalaya wei wow kyntu leh ya u Montri Rangbahdooh ka ri, u Narendra Modi wa u Montri ka kaam pohyung, u Amit Shah wow e ya ka ILP.
Chwa ini neiliang ki dkhot ka CoMSO da thmu ki wow pynman ya i yakhih wa syndet hakhmat ka yungkrehkaam ka BJP Meghalaya, Shillong, hadien wa yoh yutip ki yei wan uni u montri ka sorkar pyrdi wow sakhi yei jied ya kiwa mihkhmat wa thymme ka BJP ha kani ka jylla.
Hadien wa u Montri da yoh yutip u ya ini i thmu ki seiñbhalang wow tia cha ka yung krehkaam ka Party, da phah khut noh u ya ki wow ap yei dawa yong ki.
Hawa yaklam hadien i yachem, u Donboklang Kharlyngdoh da ong u wa ka seiñ da pynsñiaw ko ha u Sanjeev ya i man i long ka jylla ha ki bnai wa dadep, hadien wa ka sorkar da pynman aiñ ko ya ka CAB.
Da ong u leh wa ini i yachem toh wow phah ktien lyngba uni u montri cha ka sorkar India wow pynkynmoo ya u Amit Shah wa u Modi wow e noh ya ka ILP neibynta ka jylla Meghalaya. U Kharlyngdoh da ong u wa neiliang u Sanjeev da kular u wow chimkhia u rah ya kani cha ki bor ha Delhi.
Hawa yaklam won wa u Sanjeev da ong u wa daw yaklam u ya kani ka phang wei da ong u wa da kular u ya ki dkhot ka CoMSO wow kyntu ya u Amit Shah wow khut yaklam noh neibynta ka ILP ha Meghalaya.
Chooh chooh da ong u wa kam u Montri toh i kaamram yong oo wow yaklam wa kiwon kiwon ki seiñ næ ki dhab wei daw rah u ya i dawa ki paidbah ka jylla hajrong i pynkrehkaam ya ka ILP hakhmat u Montri Rangbahdooh ka ri India, u Narendra Modi.
Discussion about this post