Hajrong i jia wa sñiawsih wa da jia haka chnong Umsalait West Jaiñtia Hills, heiwa ki arngut ki khynnah wa chi payu tre da chah riñ ki hei bordiñ hadooh wa dooh ki yei mynsien wa kordor, neiliang ka 4-Mowkaiaw Block Congress Committee da suba joor ko wa ini ye wow man na i daw i kreh habra ki wakreh ka MeECL ha i por wa pyndait yaki sainar bordiñ ha ki chrot bordiñ.
Ka 4-Mowkaiaw BCC da dawa ko na ki bor pynlai District wow pyman daka takit wa bniah khnang wow chem yeiwa sakhiat waroh. Wei da dawa leh wa ka chnat MeECL kamjooh ka sorkar toh wow pyrkhat neibynta wow e laad yarap cha kani ka manyung kawa maad yeini wa sñiawsih.
Da ong leh wa boonsien da yoo da ki khmat yei chah iehbeiñ wei wym bna ka chnat MeECL ya ki chnong lane ki thaaiñ kiwa cha nongkyndong wot hapyrdi wa da pyntip wei ujor naki bor chnong lane na ki bru samen leh. Ini i kheiñstiñ toh nadooh ya ki chrot bordiñ kiwa da sap sarah wei kiwa da pai thlu kamjooh ki sainar wa da tkut, iwa da booh ya ki bru hapyrdi i maa neibhah wa ye u oor u tkut ha iwon iwon i por wa wan ka la-ær wa u slap wa joor.
Kamtæ ka chnat MeECL wa ka sorkar toh u chimkhia bha ko hajrong kini ki bynta, ym du wow chimkhia wow pynrkhiñ yaka bai bordiñ, khnang wa kam kini ki jia ym jia de ki neini chakhmat. Khaddooh dooh ka 4-Mowkaiaw BCC ka phah ko yaka khubor sñiawlem cha ki bei ki pa wa kiwa ha yung ha sem yong kini ki diah khian kiwa da khlaad noh wa u Blai i suk u pyntngen u ya ki wei u ya emlang u wa ki.
Ka kyrwoh na u Cleverson Shadap Manner, Publicity Secretary, 4-Mowkaiaw BCC.
