Ka Dr. Norman Tunnel Hospital Jowai, kawa da lai luti da boon phaw snem wow e i chakri yaki paidbah hei chait i khiah, ynne ka sngi da yoh ko u wai ya ki kreh waphær waphær wada chna pyndep ha kani ka Hospital neibynta u rap pynpliah i chakri wa kynthup yaka Ramp Accessway, ka Maternity Block, ka Elevator/Lift, ka Physiotherapy Block, ka Administration Building waka Retaining Wall.
Ha kani ka sngi wai da emlang u Rev. D. Rymbai, Moderator KJP Assembly, ka Evarinia L. Warjri, MCS, Additional DC, West Jaiñtia Hills, u Dr. K. Ajar, District Medical & Health Officer, West Jaiñtia, kiwa yahkhmat ñiam wa naki Balang waphær waphær, ki bru waheh wa kiwi.
Haka yalang wa pynlai da u Rev. N.S. Phawa, ka Medical Superintendent yong ka Dr. Norman Tunnel Hospital ka Dr. D. Nongpluh da pynsñiaw ko yei lai luti ka Hospital wa i eh wa tyngkhooh ki neibynta u pynku chooh chooh yei chakri.
Heiyatoh wa ki kreh wa chna ha kani ka Hospital, ka Dr. Nongpluh khana ko wa da yarap sñiawbha da ki Balang waphær, ki bru samen, da yoh leh naka MP Scheme lyngba u Dr. W.R. Kharlukhi, wa kynthup leh na u (L) Rev. D. Leslie Jones uwa naka ri Wales lyngba ka Presbyterian Church of Wales.
U kongsan yong kani ka sngi, u Rev. B.B. Lamin, Moderator Presbyterian Church of India, General Assembly hawa klam da e khublei u ya waroh kiwa embynta u noh kyllooid cha kani ka thaw sumaar nadooh kiwa em ha jar i jait ngait wei e khublei u leh yaka Managing Committee wa lyngba i lai luti wa boon i eh da ye ko u wai ya kini ki 6 tylli ki kreh ha kani ka sngi, deiwa kyrmen leh wow nang ku chooh chooh chakhmat.
Kam kiwa yahkhmat ka KJP Assembly ong u toh u man kiwa sñiawngooh yow Blai neibhah lyngba ki Missionary na ri Wales da ye u pyndep ya kani kawi ka Ministry kawa yatoh hei chait i khiah.
Kmen haroh u wa ki Balang bood ki ya waroh le tylli ki Ministry wa u Blai da booh u wa kynthup ka kaam yalap bru, iwa ar i sikai deiwa booh yaki thaw puræ katwa iwa le won i pynyoh yei chait i khiah deiwa booh Hospital heiwa ki bru u yoh ki ka laad sumaar.
Kamtæ e u i kyrkhu kyrdoh ya waroh kiwa kreh ha jar jiar ki bynta ha kani ka Hospital, khang wa kiwa wan ha kani ka thaw sumaar u yoh maad ki yei chait ym du hei doh tangwa wot hei mynsien kamjooh.
