Ka Integrated Village Cooperative Society (IVCS-LTD) Mukhla Nongrim kawa da lai luti nadooh u snem 2019 heiyatoh kammon u kynchew poisa, u e ram ya ki para dkhot neibynta u sdang ki yei khih waphær waphær deilang i e sikai neibynta ka kaam wa mut u sdang, kamtæ ynne ka sngi won da ye ko u wai sa yaka Collective Marketing Centre namo ka dukan booh yow dai ya ki mar ha Ladmukhla hajan Thadlaskeiñ heiwa ye u yoh yaki baam syiar, baam sniang, baam masi, sboh kba, dawai khñiang, symbe jhoor wa kiwi.
Ya kani ka Collective Marketing Centre da wan wai da u MLA ka thaaiñ, u Wailadmiki Shylla hei emlang u A. Suting, Deputy Project Director, Meghalaya Livelihood and Access to Markets Projects, u Manager, u Sywell Lyngdoh, District Project Manager West Jaiñtia Hills deilang wa u waheh chnong ka Ladmukhla, u Bormi Lyngdoh, u waheh chnong Mukhla Nongrim u Buhlut Suna, ka Secretary IVCS Mukhla Nongrim ka Nital Suna, u Chairman Marketing Center, u Janra Sari, u Secretary Mukhla Nongrim, u Stanbyme Sari wa kiwi.
U Sywell Lyngdoh hawa klam khana u wa hapoh West Jaiñtia Hills em hadooh 43 tylli ki IVCS wei na kini, 4 tylli kiwa da Bankrupt namo kiwa da yap khih katwa kiwa neh wei lai chakhmat won hadooh katni toh 39 tylli.
Khana haroh u wa ka IVCS krehkaam ko kam ki Bank neibhah em i ya thied ya ki ‘Share’, i kynchew poisa wei yoh leh yaka sut. Tangwa rap suk won u chim ram napoh IVCS bar iwa chim na ka Bank katwa toh para wa tipmit.
Neiliang won u A. Suting hawa klam ha kani ka sngi ong u kawi ka thong wa hap yakhun u toor thma katni toh yaka yaaw Shillong kawa em 5 lak ngut i boon bru, neibhah wym pu ye u pynbiang marbaam mardih, i daw toh wym pu ye u kreh katkam wa lai ka yaaw, wei wot ki pli ki warep leh rep ki toh wa sñiawsuk ki dei wym pu tip ki u rep katkam wa kwah ka yaaw.
Seiwi leh ong u ki bru dang yooluti bait ki yei khih sorkar næ yang bait wow leh ka sorkar iyi iyi neibynta yong ki, tangwa haka IVCS sikai ko kammon u khih kamjooh leh yow pynyoh khih ya kiwi.
Pynrap haroh u wa kam ki warep toh u man kiwa sian u rep katkam wa yah ka yaaw, wym toh u yooluti naka sorkar neibhah da sñiawthooh wym ye ka sorkar u leh lut ya waroh.
Heiyatoh waka thong wada mang neibynta ka yaaw Shillong khana haroh u wa katni da em ki da ka seiñ neibynta ka Eastern Region wei naki 169 ki IVCS dang 48 tylli donhi kiwa psiah.
Yow poi cha ka thong ong u emkaam kawi ka thaw pynlang mar rep ha Shillong kamjooh ka Cold Storage khnang yow ye u pynpoi chithaw don ki mar rep wei i dor leh u man ko thij kamwa yakut na tre wei u dai leh salonsar i dor ha waroh ki thaw ha Shillong, wei lada ye heini i rukom, ka jylla leh u ku ko.
Da e nongmuna u wa kamwa man katni lada ya u sapdok da dai T. 20 ha Iewduh, ha Laitumkhrah won T. 60.
Neiliang u Wailadmiki Shylla won hawa klam ong u boon i kreh i khih haka jylla wa wan knieh da kiwa na baar, i daw toh wym bien ki bru yong i u kreh, iwa pynyoo ka lada em kreh leh tangwa i won ym bien i wow kreh wa da yooluti bait yei kreh sorkar.
Neitæ won wot hawa ka sorkar pyrchang ko u pynyoo ki laad luti yow bien ki paidbah u sdang khih deiwa yaleh hadooh u e seiñ e dang leh, boonsien ki bru wymjooh chimkhia ki, pteiñ ki u yooluti ha katæ ka khih wa daw yoh seiñ naka sorkar.
Hawa kyntu yaki paidbah u sdang ya kawon kawon ka khih deiwa pait bniah da kawa yoo yoh nong, yaroh u leh yaka IVCS Mukhla Nongrim kawa chynna u wai kat kani ka jait dukan wei kamjooh leh hei thaw wa biang, neibhah hawa seiñ yei khih emkaam u pait yaka yaaw.
Da pynrap haroh u hajrong i emkaam u pynkylla yaki mar rep deiwi won i rukom kam ki mar baam wa ye u neh slem wei rap hoi dor.
