Jowai : Ha kani ka 29 tarik wa dep yong uni u bnai ka kong Wansuk Syiem, Rajya Sabha MP da wai ko ya ka khnap thangbru wa em ha Myndihati hei emlang u ma V. H. Pala, MP.
Ya kani ka khnap thang bru da yarap poisa da ka kong Syiem kamjooh deilang wa ka poisa 10 lak wa pynmih ka chnong kiwa dang em ha ka Niamtre kamjooh ki wa da man Kristan.
U ma Pala u wa man kam u symbood kongsan ong u wa ha ki boon tylli ki ri wa da yoh u yooh kjat chem u wa em ki ri wa hadooh ki kristan leh thang ki ya ki metyap neidaw wa em em thaw de u tlep bru wei da pyllang ya i tpai ki wa yap ki khcu khian.
U ma Justin Dkhar, MLA Khliehrait hei klam yong oo da pynchlur u ya ki paidbah y pynemkaam ya kani ka khnap neibhah em ki thaw wa ki bru tieñ ki u pynemkaam ya ka. Kamjooh da e buit u ya ka chnong yow e kti ki ya ki thaw ka Raij cha ka tnat Forest yow ker pood kamjooh leh yow thung deiñ ko ya ki khloo wa jan lut neibhah neini cha khmat ym emkaam deiñ de chiboon u thang bru.
Natlor ka khnap thang bru wa wai da ka kong Wansuk Syiem, da wai leh ya i thaw booh chyieñ da u ma V.H. Pala, i thaw chong thaw yang paidbah da u ma Justin Dkhar wa ya ka kari tan metyap da u ma Comingone Ymbon.
U ma H. Toi ha ka yalang da kynmo warom u ya u tynde u ma Kambel Shullai u wa saiñdur ya kani ka khnap wei pyntip u leh wa da dep yoh award u na u President warim ka ri India u A.P.J Kalam ha Gujarat ha u 2006, ha u 2010 da dep yoh u leh ya ka ‘Harmony Award’ na u aktor warim ka Bollywood u Dev Anand. Kamwa man katni da palat 30 tylli kini ki khnap da dep chna ha ka jylla kamjooh ka wi ha Tura wa sa ka wi wa daw wai ha Phulbari.
Discussion about this post