Ka Dorbar Chnong Ladthadlaboh, Jowai lyngba ka Indoor Sports Committee ha ka 14 tarik uni u bnai da wai paidbah ko ya ka chlem e sikai yalehke Badminton neibynta waroh, hapoh ka Indoor Sports Hall ka chnong, heiwa kiwon kiwon kiwa ka-it ya kani ka jait yalehke kiwa na baar ka chnong Ladthadlaboh leh ye ki u wan yalehke deiwa pynpsiah pyrtuid ha jar jiar i por wa da booh.
Ya kani ka chlem e sikai da wai paidbah da u Dawanroi Pyrbot, President ka West Jaiñtia District Badminton Association kam u kongsan hei emlang u symbood kongsan u Emerick Dkhar uwa man kam uwi u bru waheh ka chnong Ladthadlaboh hei sakhilang kiwa yahkhmat chnong nadooh u waheh chnong u Aiban Shullai wa kiwi.
U kongsan wa u symbood kongsan kam ki bru wa ka-it ya ka yalehke Badminton da khana ki yei lai luti yong ki ha kani ka jait yalehke ha ki por nachwa wa hap maad ki boon i eh i khoo khamtam wa hap ki u yalehke kat chawa em ki madan iwa hap yakhun deilang ya ka la-ær, tangwa hanla kattæ leh man hi ki kiwa rap poi chakhmat ha kani ka yalehke deiwa dohyap wei kreh chitom ki.
Hawa yaroh yei ye ka Ladthadlaboh u pynmih ya kani ka chlem e sikai kawa biang katkam wa yah ka juk neibynta warohlang kiwa em i angnood u lai chakhmat ha kani ka jait yalehke, yooluti ki wa ka yalehke Badminton ha ka District leh u nang ku chooh chooh ko ha ki sngi wa ki por wa chakhmat.
Heijooh i por leh yooluti ki wa ka Ladthadlaboh u yaleh chooh ko u wanrah sa kiwi tawon ki jait yalehke khnang wa kiwa em sap ha jar jiar ki jait yalehke u yoh byntalang ki, wei yow lait ki leh u ngop hei pynchoi wa sih ka imlang sahlang.
Discussion about this post