Ka Sohmynting Dongwah, West Jaiñtia Hills District haka 2 tarik uni u bnai da wai ko yaka rynsan kawa da chna kyrpang deiwa pynyabi lang waka Community Hall wa em harood ka madan Mooknor yong ka chnong Sohmynting.
Ya kani ka rynsan da chna lyngba ka poisa wa yoh yarap na u MDC ka thaaiñ u Lakhon Dkhar kamwa Rs. 8 lak wei da wan wow wai leh da oo hi.
Katkam i pyntip na u Orlan Kya, Chairman Dongwah, ong u kani ka rynsan toh neibynta u pynemkaam ha kawon kawon ka kaam yonglang la neibynta u chong yalang paidbah, u pynman ki jait lehkmen, u man yaseiñ wa kiwi de.
Neiliang u Lakhon Dkhar hawa klam, e khublei snem thymme u ya ki paaid ka Dongwah deiwa yooluti wa u 2024 wow man u snem i kyrkhu ha waroh ki liang wei yow yoh yeiwa mut wa mang.
Da e khublei haroh u ya u snem warim wa hanla boon i dawa wym yoh u pyndep lut leh ngait skem u wa kawi pa kawi ka manyung da yoh ko yei kyrkhu.
Heiyatoh i yarap wa da e u cha ka Dongwah, ong u wa kamwa da jied ki oo yow mihkhmat cha ka JHADC da pyrchang u katwa ye i bor wa joh wa jam han lym yoh u e lut katkam wa dawa.
Kamtæ kyntu u wow man kiwa yaichah boi daw ye u e chooh ha ki por wa daw wan.
Da yoh leh i klam na u waheh chnong u Bravestar Phawa, u Dolloi ka Elaka Amwi, u J. Pyrtuh neitæ u D. Pyrtuh wa u Marbhah Shylla, Vice Chairman Dongwah.
Ha kani ka sngi ki paaid ka Dongwah da pynman haroh ki yei lehkmen pdiang burom snem thymme deiwa pynman i baamdoh yonglang kamjooh i lai i chaad kmen ha kylleiñ ka chnong deilang i pynchaad syntu da kiwa yah phrang, wei yeini i rukom pynchaad syntu toh iwa da yah sikai nadooh ki waheh wasian nachwa.
Discussion about this post