Shillong: U Gavin M Mylliem, MLA ka Sohra Constituency uwa man leh u Chairman ka Khadi and Village Industries Commission (KVIC) yong ka sorkar jylla da pyntip u wa i thmu pynbha ya ka sarok na Umtyngngar chadooh Sohra dang em ko ha i luti wow yoh mang tyngka yow pynkreh.
Ya ini da pyntip u MLA ka PDF na Sohra hawa klam haka yalang wai ya u mooyurim kam i dak wow sdang kreh pynbha wow siang rong noh ya ki sarok chnong (3.357 KM i jrong) ha Elaka Laitlyngkot ya kawa da mang tyngka kamwa 2 klur 70 lak tyngka na ka State Plan ha ka sngi Thohdieñ.
Hawa yatoh wa katai ka sarok na Umtyngngar cha Sohra da ong u, “Nga yoo oo ha ki laad pathai khubor wa u MDC ka Sohra (u Titos W Chyne uwa man leh u CEM ka KHADC) da ong u wa katai ka sarok na Umtyngngar cha Sohra da dep yoh mang tyngka tangwa ym toh kamtæ wei ka File dang sahkut wei ym pu yoh ya ka mang tyngka wow pynkreh “.
Deiwa pyntip wa ya ka surok na Umtyngngar cha Sohra da siang rong pynbha nadooh u 2012, da ong u, “Ya ini nga da rah O ha ka Yung Dorbar Chna Aiñ ka jylla wei nga da phah O yei thoh cha u Montri Rangbah hajrong i emkaam wow pynbha noh ya kani ka sarok. I da dep chong yachem i wow pynyoh mang tyngka na ka Systematic Maintenance Programme wow pyrchang u yoh T. 12 klur yow pynbha ya uni u sarok”.
Da ong u wa ya katni dang sahkut wei ym pu poi ka mang tyngka na ka chnat PWD (Roads) kawa mang wow pynbha ya ki sarok khamtam kani ka sarok kawa da ktah ya i lai i wan khamtam kiwa wan uiñke cha Sohra. Da ong wa kam uwa mihkhmat ym kwah u wa i ktien u lai chwa i ya i kaam. “Nga ym jooh kular O chwa i por wei nga u kreh O neibynta i biang i miat kiwa chong chnong”, da ong u.
Hawa yatoh waka sarok chnong ha Laitlyngkot, deiwa e khublei ya ki sahep sorkar, ya u Montri Rangbah wa u Symbood Montri Rangbah, da ong u, “I emkaam i ya i yakrehlang wow kyntu ya ka roi ka paar ha ka Constituency wei kam ka sorkar u chim kongsan ya i chait i khiah, ka puræ puthi, ki sarok wa ki luti syngkieñ, ka um baam um dih wa kiwi kiwi won”.
Kiwi kiwa ya emlang ha kani yalang kawa da pynman ha yung Dorbar Chnong ka Dong Nongthymmai-Lumthangding, Elaka Laitlyngkot kynthup ki ya u David Pyngrope, Executive Engineer PWD (Roads), NH Shillong By-Pass Division, u Allenson Shabong, Sordar, u R. Majaw, Rangbah Shnong, u T. Dkhar, Rangbah Shnong, ki bru rangbah deilang wa kiwi won.
