U Montri ka chnat i rep i riang yong ka sorkar jylla u Banteidor Lyngdoh ynne ka sngi da wai u ya ka Farmer Development Centre ha Madankynsaw kawa haap hapoh ka Laskeiñ C&RD Block neibynta wow pynsuk ya ki warep heiyatoh i kit i bah wei kamjooh leh u pynlai yaaw ya ki mar deiwa wan pynpoi ya ki mar rep ha kani ka thaw.
Najrong wa wai ya ka Farmer Development Centre da e kti haroh u chaka kynhun warep ka Life Spices Processing Cooperative Society da ka kor wow Test yei Curcumin Content namo hadooh katwon miat u chyrmit wei kamjooh leh da wai u yaka thaw thaad chyrmit kawa da e kti cha ki Village Organisation.
Hawa e yei klam, neiliang u Montri yooluti u wa kani ka kor daw pynmyntoi ko ya ki warep deiwa ban joor haroh u wow nangleh bha chooh chooh hei kam rep Chyrmit Lakadong khang wa ka yaaw chyrmit wym kut ko du hapoh ka jylla tangwa wot cha baar ka ri kamjooh.
Yeini da kubur u wa ki warep ka thaaiñ ye hi ki u leh neibhah ki toh kiwa da yoh chwa yei kyrkhu, kamtæ iwa emkaam toh u kreh chitom najrong wow em i yajan wa oo kam u Montri i rep i riang deilang wa ki sahep sorkar.
Da pyntip haroh u wa ka sorkar pyrdi deilang wa ka sorkar jylla da tipmit ki ya le tylli ki thaw wow chna ya ki Farmer Development Centre itæ toh ha Jaiñtia Hills, Garo Hills wa ha Khasi Hills.
I sneiñ wa kongsan ong u, “Kynmoo ham jooh dai tylli yow chyrmit, tangwa wow ah rnooid namo wow Slice chwa næ tylliat lakit, neibhah neidaw wa bna naam ware u chyrmit na kani ka thaaiñ boon ki yaaw cha baar jylla booh ki yei thoh hi-heh wa toh u Lakadong Turmeric tangwa wym em won ki ya ka Curcumin Content kam u yong i”.
Kamtæ khang wa i mantre u neh i hapoh kani hi ka jylla, kyntu u wow pynneh pynsah wei wow man kiwa stat wym wow chah yah luti bakla.
Ha kani ka sngi da yoh i klam pdiang na u Ramkumar S, Nodal Officer SVM wa MD National Health Mission, i klam hajrong ka Farmer Development Centre na u Srihari Kothela, Founder and CEO ka e-Fresh Global, neitæ i klam na u Sampath Kumar, Principal Secretary Health and Family Welfare ka sorkar Meghalaya wa na u KN Kumar, Chairman Farmers Commission, u D. Sathiyan, IAS Secretary Spices Board ka sorkar India wa kiwi kiwi.
