Jowai: U montri ka tnat C&RD ka sorkar jylla u Commingone Ymbon ynnin ka 1 tarik da wai u ya kawi ka thaw e sikai tem ha chnong Shangpung wa da tip kam ka “Cadenza School of Music” kawa da mantre da u khynroo Kenneth Anderson Iakai haka yalang wa pyllai da u Damewanmi Suchiang chirup i wan sakhi lang ki waheh wasian ka chnong wa kiwi kiwi ha Shangpung Khliehmushut.
U khynroo Kenneth Anderson hei klam yong oo da khana u wa o nadooh i rta wa 5 snem da sdang u wow ksoh guitar wei dei e ka mynsien ka bei yong oo kawa jooh ka’it u tem u rwai ha yung; hei rta wa 7 snem da sdang u wow tip u tem malu mala, wei hadien wa yoo ka bei u yei sap yong oo da pyllai Music Class ka oo ha Jowai ha Arnest Memorial Music School.
Kamtæ hadien wa da yoh u i sikai wa pura wei da jop u leh ha kiwa boon ki yakop nadooh District hadooh ha State Level, da wan i sñaw ha oo wa yei sap wa em ha oo ym kwah u wow murieh u kut du ha oo samen, tangwa kwah u wow saam lang cha kiwi tawon ki lok ki jor wa maya yei tem. Seiwi leh kwah u wow booh ha Shangpung wa yoo u ka chnong yong ki toh kawa khlan bha ka put ka tem hanla khlem yoh ki yei sikai, yooluti u wa deiwa em pathan ka thaw sikai u rap ku chooh chooh ko. Heijooh i por khut u ya kiwi tawon ki lok ki jor na kiwi tawon ki chnong wa marjan wa em i sap tem u wan pynjanai ki ha kani ka skur.
U P. Nongbri Principal Arnest Memorial Music School Jowai kam uwa da jooh yoo bha yei sap u Kenneth heipor wa dang puræ u, da yaroh u oo wa man u u bru wa kreh chitom wei wa kwah u ku chakhmat. Kamtæ booh u i kyntu wow man u bru wa sñiaw khian, wa yaichah. Seiwi leh ong u i rukom im wa bha toh iwa emkaam tam yow ku chaphrang neibhah kitu ki wa tem wa pynemkaam wei dih i baam wasih boonjait ym em man ki kiwa tem wa sakhiat.
Yooluti u wa i em kani ka Music School u pynkylla ko leh ya kitu kiwa da ngop hei dih i baam.
Da pynkut u deiwa ong u wa sñawkhian, wa kiar nei dih wa boonjait, man ka nongmuna ya kiwi wei yaineh hadooh wa kut.
Neiliang u kongsan u Commingone Ymbon hei klam yong oo da yaroh u ya uni u khynroo wa da chim u i kitkhlieh nei bynta ki bru ka thaiñ wa em i sap tem, kyntu uleh ya ki manbei manpa wa em ha kani ka yalang u man ki kiwa nyngkong wow phah ya ki khon ha kani ka thaw kam ka dak u pynchlur ya uni u khynroo.
Hei yatoh wa i dooh khih dooh kreh da ong u kani leh man kawi ka laad wow yieñ hei yong i hi ki kjat ymtoh u yang du yei khih sorkar neibhah man iwa saja u yoh. Da kyntu haroh u wow pynchitom yei jabieñ wow pyrkhat “nga da kayi u leh O næ u sdang O”, ymtoh waroh waroh u ya bood yeiwa da sdang kiwi neibhah lada waroh u leh yeijooh waroh u ya dooh myntoi kamtæ emkaam u pait da kiwi tawon ki laad ki luti neibhah dang em chiboon kiwa ye u pynmyntoi ya ki.
Kiwi won wa e i klam kynthup i ya ka Annumanda, u D. Langstang Executive Engineer, PWD Road, North Division Jowai wa kiwi kiwi.
Discussion about this post