Wai u Conrad ya ka Shillong Technology Park ka wow e kreh ya ki 1500 ngut 

U Montri Rangbah ka jylla, u Conrad K. Sangma ynne ka sngi da wai u ya ka “Shillong Technology Park” hei emlang u Montri ka chnat Information Technology and Communication, u Hamletson Dohling, u Montri ka chnat PHE u Renikton Lyngdoh wa kiwi kiwi.

Hawa e yei klam ha kani ka sngi u Conrad da ong u wa kani ka Park toh kawi na ki 300 tylli ki Project wa da leh da ka sorkar kam chibynta yong i dap sanphaw snem ka jylla wei daw wailaad ko ya kiwa boon ki bru wa kreh ha ka Information Technology (IT) naka jylla wow kreh neibynta yong ka. Da pynrap u deiwa ong wa kyrmen skem u wa ki khynroo khyllood kiwa em cha baar ka jylla daw kwah biang ki wow uiñ cha yung neibhah da angnood wa hapoh 10 snem ka jylla u man ko kawi na ki jylla wa khlieh dooh ha ka ri. 

Da ong u wa hapoh ka jylla 70% kiwa chong chnong toh kiwa hapoh 35 snem i rta wei emlaad bha ko ha ka IT Sector. 

Heiyatoh wa i yoh kreh, u Conrad da ong u wa ha ka bynta wa nyngkong yong kani ka Park toh wow e kreh ya ki 1500 ngut wei da antaad leh wow yoh kreh sa kamwa le chah deiwa em kani ka Park.

Related posts

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Chooh chooh da ong u wa ha ka bynta wa nyngkong, da chna ya i yung da ka sorkar jylla, wei ki kaam wow bood toh wow pynchlur ya ka Shillong Technology Park wow kreh ko kam ka Public Private Partnership (PPP) Model.

U Conrad da pyntip u leh wa daw booh ya ka Single-Window wow pynsuk ya ki karkhana na baar wow kreh na kani ka Tech Park wei ini daw pynsuk bha i ya ki khynroo na ka jylla hei wow ye ki wow kreh pyn hapoh ka jylla khlem emkaam wow lai cha baar.

Da ong u leh wa i em ka Shillong Airport daw pyntikna ko wa suk i lai i wan ki CEO wa kiwi ki heh ki karkhana wow wan cha Shillong. 

I kreh ya kani ka Tech Park da sdang i ha u 2019 wei da pyndep yeini du hapoh 25 bnai heiwa da em kattu katni ki karkhana (Company) wa da pynyoo yei dak wa kwah ki wow seiñ khih ha kani ka Park. 

Ha kani ka sngi u Montri Rangbah da wai u leh ya ka “TechDigital” BPO heiwa daw yoh kreh 300 ngut na ka jylla. Ka TechDigital toh ka karkhana wa kreh neibynta ka Total Talent Management Solution kawa em ya ki yung krehkaam ha USA, Canada wa ha India.