Shillong: Ka tamasa pynyoo rong ya ki baam tynre kamjooh ka yaw dai baam wa le sngi yong ka thaaiñ mihsngi kawa tip kam ka North East Food Show, da pynman daka Meghalaya wa ka Salon International de l’Agrolimentaire (SIAL) Group, wa nyngkong dooh hapoh jylla wie da wai ya ka ynne ka sngi da u montri rangbah ka jylla, u Conrad K Sangma hei emlang u montri ka rep ka riang, u Banteidor Lyngdoh.
U Conrad hawa e yei klam da ong u wa ka thaaiñ mahajon bha ko wei yooluti u wa na kani ka tamasa u yahluti ko ya ki warep wa kiwa im nei kaam chet.
“Ka thaaiñ em ko chiboon wow tyrwa ya ki warep wa kiwa seiñ kreh tangwa em i duna heini heitai katwa kamtæ man i iwa emkaam bha wow pynman ya kam kini ki tamasa,” da ong u Conrad.
Da ong u leh wa kani ka tamasa wa le sngi daw yarap ko u wanrah chirup ya ki warep, kiwa seiñ kreh, kiwa thied, kiwa chet, ki tre Hotel wa kiwi kiwi.
Kani ka tamasa toh kawa pynman da ka sorkar jylla chirup wa ka Inter Ads Exhibitions Pvt. Ltd, kawa man kawa yoh License na ka SIAL ha India, wei ka SIAL toh kawa da kreh ha kani ka bynta la 50 snem.
Ha kani ka tamasa daw pynman leh ya ka esikai, i pynyoo kammon u chet wei ha ka sngi pynkut ya ka daw em ka North East Chief Ministers’ Conclave kawa daw emlang kiwa chna aiñ ka sorkar jylla wa ka sorkar pyrdi kamjooh ki bru samen kiwa em hapoh kani ka yaw chna wei dai baam yow ya phyllu yumut.
U Conrad da wai u leh ya ka Meg Tea Factory, Upper Shillong, ka website ka Directorate of Food Processing wa ka Meghalaya Plastic Free Challenge Bags.
Discussion about this post