U Montri Rangbah ka jylla, u Conrad K. Sangma ynne da wai u ya ka yung skur Higher Secondary ka St. Xavier’s ha Umoid kawa em hajan Mawkyrwat, South West Khasi Hills hei emlang u MLA ka thaaiñ uwa man leh u Montri ka chnat, PHE, u Renikton Tongkhar Lyngdoh, u Regional Development Director, Jesuits in the Northeast India, u Fr. Anand Pareira wa kiwi kiwi.
U Conrad hawa e yei klam da ong u wa ka Jesuits da yarap bha ko wow kyntu kynrong ya ka imlang sahlang wei da kyrmen skem u wa ka St. Xaviers Umoid daw man ko kam ka ‘Centre Of Excellence’ ka wow esikai ya ki khynnah ka thaaiñ.
Hajrong i pynyoo sap ki khynnah ha kani ja sngi, u Conrad da ebuit u ya ki wow em ki ya ka thong wei wow kreh hajrong itæ, deiwa pynrap wa ym em da kawi ka luti lait nei minot wei kreh chitom.
Da pyntip u leh wa ka sorkar daw kreh ko wow chna pynmiat ya ki thaw uiñke suwari ha South West Khasi Hills heiwa da pynkhreh u ya ka Project wow yoh yarap na ka JICA wei ya ini leh da pdiang da ka JICA.
Chooh chooh da ong u wa toh i kaamram ka sorkar wow thooh laad ya ki paidbah wow imja ki heiwa ym emkaam wow kyruiñ ki du cha ki khloo wa ki mar poh-khyndaw wei wow sdang da kiwi ki jait kreh kam na ka uiñke suwari.
