Tura: U montri rangbah ka jylla, u Conrad K Sangma ynne da wai u ya ka yungskur wa thymme ka Wadanang Secondary School, Tura ya kawa da chna lyngba ka “Supporting Human Capital Development Project in Meghalaya” wei yarap poisa na ka Asian Development Bank (ADB).
Kani ka Project thmu ko wow pynku ya i puræ puthi heiwa lyngba yong ka da ye u pynku kyrdan ya ki skur kiwa kynthup ya ki skur sorkar wa ki yong ki seiñ wa ki bru samen.
U Conrad Sangma hawa e yei klam da ong u wa kani ka Project man ko i kyrkhu ya ki khynnah skur wa ki paidbah ka dong Wadanang kamjooh leh ka ri-loom Garo wa ka jylla hi waroh kawi.
Da ong u leh wa da toh i por wow e khublei ya ki bru wa emkti wow pynmankaam ya ka kam ki montri ka sorkar warim, u montri ka chnat Sports and Youth Affairs, u Zenith Sangma wa u MLA ka thaaiñ, u Noverfield R Marak, ka sorkar wa katni wa ki sahep wa da kreh wow poi hadooh kani ka thong.
Chooh chooh da ong u wa ka sorkar angnood ko wow wanrah ya kani ka Project cha ka bynta wa ar (Phase II) yong ka khnang wow yoh myntoi ki skur na ka.
Ka Wadanang Government Aided Secondary School da sdang ya ka ha u snem 1932 wei da pynku kyrdan ya ka cha ka Secondary School ha u 1985.
Ha kani ka sngi da emlang leh u Deputy Commissioner, West Garo Hills u Ram Singh, Additional Director, School Education and Literacy, Tura u P. Ryngsai, Chairman, Tura Municipal Board & Member SMC u J D Sangma, Additional Deputy Commissioner, WGH u ZJ Sangma, President SMC, u FK Marak, Secretary SMC FR Marak, Project Director, DRDA, WGH u CN Sangma, Mathias Marak, wa kiwi kiwi.
Discussion about this post