U Montri Rangbah ka Meghalaya, u Conrad K. Sangma ynne da booh mooyurim wei da wai u ya kiwa boon ki kaam pynroi wa da dep chna ha Babadam, West Garo Hills deiwa emlang u Lamphang, u Thomas A. Sangma wa u Montri ka chnat PHE, u Marcuise Marak.
Kawi na kiwa da wai toh ka Garo Hills Agro Food Park kawa da sdang da ka All Garo Hills Multi Purpose Cooperative Society (AGHMPCS) wa yahkhmat da u Fr. Sunny Mavelil. Kani ka Food Park toh kawa da pynlut waroh da ka sorkar jylla yow chna hei dor wa Rs. 15.73 klur kawa kynthup yaka Mustard Processing Unit, ka Cashew Processing Unit, ka Hi-Tech Food Lab, ka Ginger Processing Unit, Solar Power Plant wa 25 tylli ki Cold Storage Unit.
U Conrad hawa e yei klam da ong u wa ka sorkar jylla da booh ko ki laad ki luti wow yarap ya ki warep deiwa sikai ki leh kammon wow song ya ki mar yong ki, u pynkylla ya ki mar rep cha kiwa boon ki jait wei kamjooh wow yarap pynlai yaaw ya kini ki mar yong ki.
Kani ka Agro Food Park toh kawa ye u chim hadooh 100 MT ki mar rep wa dang dep khait dep rep chi snem wa kynthup nadooh u yanem, u syiñ, u kwai wa u Cashew.
U Conrad da khana u leh wa ha kini ki 6 snem, da wai 166 tylli ki Processing Unit neitæ 154 tylli ki Warehouse wa 34 tylli ki Cold Storage kiwa da em wot ha ki thaw wa em cha kdong cha chmiang ka jylla.
Da pyntip u leh wa awjan Rs. 357 klur da booh bhah yow chna ya ki thaw wow rah ya ki mar nadooh ki thaw rep hadooh ki thaw wow pynkhooid pynchna ki wei ini da yarap ko wow pynku da ar chah i yoh nong ki warep kiwa da em 4.5 lak tylli ki manyung.
Kamtæ da yooluti u wa kani ka Agro Food Park ha Babadam daw man ko kam ka nongmuna ya kiwi wow pynbood ki.
Da khana u leh wa daw pynman yei yah ya ki warep cha kiwa boon ki thaw yow tip ki wei wow yoh buit ki na para warep.
U Conrad da wai u leh yaka Arecanut Processing Unit wei da booh mooyurim u yow chna yaka P.A. Sangma Shopping Complex ha Babadam.
Discussion about this post