Wai u Dr. B. Challam yaka “Panaliar Women’s Welfare Crèche”

Jowai: Ka Panaliar Women’s Welfare Organisation (PWWO), kawa man ka seiñ manbei wada seiñ nadooh ki phaw snem nachwa, ha kani ka kynti da jop ko ya kawi naka thong wa da angnood ko da slem, itæ toh wa ynne ka sngi da ye ko u wai yaka Crèche kawa da tip kam ka “Panaliar Women’s Welfare Crèche” wa em ha yungwalieh ka chnong Panaliar hi.

Ya kani ka Crèche da wai yaka ynne i janmiet da u Dr. B. Challam MBBS, MD uwa man leh u khon ka chnong Panaliar haka yalang wada pynman ha yungwalieh, hei sakhi lang ki khon ka chnong nadooh ki manbei manpa, khynroo khyllood ki waheh wasian wa kiwi.

U kongsan u Dr.B. Challam hei klam yong oo ong da ong u wa ka Crèche hi man ko kawa emkaam bha ha kini ki sngi neibhah yarap ko chiboon yaki manbei manpa ki wym yohpor u pait khon neidaw wa yabeh khih beh kreh ki. E haroh u i yaroh yaka seiñ kynthai wa ini man i i kreh chitom wei chynna jngai yong ki heiwa ki manbei manpa u yoh ki wow wan booh yaki khon ki kti yong ki.

Neitæ yow khriñ yaki lok ki jor wa nadooh najan najngai wow wan booh ki yaki khon ha kani ka Crèche ong u wa chong hei tipsap kiwa kreh, iwi toh wow chim yaki khynnah kam ki khon yong ki hi nalor wow pynjooh pynka-it ya ki.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Heijooh i por neiliang yong oo kular haroh u wow wan e Check-up mynkna yaki khynnah kani ka Crèche kamwa chisien 3 bnai, nalor wada e sñiawbha haroh u cha ka seiñ kynthai kamwa T. 25,000.

U symbood kongsan u Riquoma Rq Laloo uwa man leh u Waheh Chnong ka Panaliar ong u, man ko ka burom wa khroo yaka chnong hi waroh kawi waka seiñ kynthai yong ka chnong wa dapoi ko haka thong wa damut da mang dei yaksohkti lang ki khon ka chnong.

Wei kam u waheh chnong dap u dei kmen wow yoo wa kam ki kynthai wa khia lyngkor nadooh na yung hadooh i yong ki hi samen, han kattæ leh dang ye ki wow embynta haka imlang sahlang.

E haroh u i kyrkhu kyrdoh wa u Blai u nang emlang u chirup waki hei kaam waki leh ki neibynta i bha i miat ka chong ka thaw waka imlang sahlang.

Kiwi won wa e i klam ha kani ka sngi toh ki dkhot ka seiñ kynthai wa kynthup yaka Wompher Laloo, ka Yowan I Kyndiah wa kiwi haka yalang wa pynlai daka Biangtre Bamon.