Khliehriat: U montri ka chnat Social Welfare Department, u Kyrmen Shylla ynne da wai u ya ka Childline 1098 Service ha Good Shepherd Secondary School, East Jaiñtia Hills District.
Ya kani ka programme da pynman da ka District Administration, District Child Protection Unit, East Jaiñtia Hills chirup wa ka Jaintia Hills Development Society.
Ha kani ka sngi da emlang u F.M. Dopth, Deputy Commissioner ka District, u Fr. M. Pakma, Director Jaiñtia Hills Development Society, West Jaiñtia Hills District, u T. Kyndiah, District Child Protection Officer, East Jaiñtia Hills District wa kiwi kiwi.
Ha kani ka sngi da pynyoo yaka Presentation hajrong ka Childline wa e da u T. Kyndiah, heiwa da ong u wa katni, i man i long ki khynnah hapoh ka District man i iwa sñiawsih wei iwa yoo wyrai, wei ka chnat thooh laad ko kammon wow yarap ya ki lada ha yung namo ha skur mo ha sarok.
Da pyntip u leh wa ka Childline 1098 Service toh uwa krehkaam ha waroh kawi ka ri wei krehkaam ko 24 kynta, wei ye wow phone hawa emkaam ki khynnah ha iwon iwon i liang.
Da ekhublei u leh ya u Kyrmen Shylla, u F.M. Dopth wa da chimkhia ki wow ye u wai ya kani ka thaw deiwa e khublei leh ya u Shibor Wahlang, u Holy Pariat, Jowai Diocese, Jaiñtia Hills Development Society wa kiwi kiwi kiwa da yarap wow chna ya kani ka thaw.
U F.M. Dopth da ong u wa boonsien sñiawthooh bakla ki bru ya ka Childline deiwa ong wa knieh ko ya ki khon ki kti yong ki wei tympiah ko ya ka manyung mansem katwa kamtæ emkaam wow krehlang chirup wow pynsñiawthooh paidbah kayi ka ka Childline neibhah wa man ko ka thaw wow yarap ya ki khynnah neibynta ka mynried wa miat wa bha yong ki.
Da kyntu u leh ya ki wakreh ka Childline wow yarap hok ya ki khynnah wei wow pynsñiawthooh paidbah kayi ka ka Childline khamtam cha ki chnong ki thaw.
Kam u kongsan u Kyrmen Shylla da ong u wa katni ki khynnah chah pynemkaam bakla ki ha ka imlang sahlang tangwa boon ymtip ki yeitæ wei ini waroh jia i neidaw wa duna i stat i tip wa i pynsñiawthooh paidbah. Da kyntu u ya ki bor wa toh u pait wow thooh ya ki daw wa pynngat ya ki khynnah ha ki kaam wa man pyrchah ya ka aiñ.
Da ong u leh wa ka Childline man ko i kyrkhu wa khroo ya ka District ka wow ye u e yarap ya ki khynnah. Da kyntu u leh ya waroh wow em i sñiaw bahkhlieh wow yada ya ki khynnah wei wow yait ki na i dih ya ki mar wa pynmuaid kam ki drugs wa i kiad.
Discussion about this post