Jowai : U ma Moonlight Pariat MDC ka Jowai South ynnin ka 23 tarik da wan wai u ya ka Presbyterian English School Sohmynting hei emlang u Dolloi ka Amwi Khliehtyrshi Elaka u ma J. Pyrtuh, u Tymmen Wasan H.S. Lypon ki dkhot yong ka chnong, ka Balang wa ki paidbah wa boon wa sakhi lang.
Kani ka Presbytarian English School da seiñ da ka Jingiaseng Samla ka Balang Presbytarian Sohmynting West Jaintia Hills District ha uni u 2016.
I thmu yow seiñ ya ka toh wa i kwah u wanrah ya i kylla katkam wa yah ki por hei yatoh wa i puræ puthi.
Na pyrdi ki 9 tylli ki Primary School wa em ha kani ka chnong toh du kani don hi ka skur wa sikai dei phareng (English Medium).
U Waheh Chnong u ma D. Pyrtuh uwa man leh u dkhot ka SMC da ong u wa u seiñ ya ka skur ha kawa sdang man i iwa eh bha hadooh kattæ kattæ iwa pyndooh thiah pyndooh dem wow thaw ya ka mynried yong ki khynnah. Neibhah katkam i ktein imsngi ka skur wa ong “You are the light of the world” ngeitskhem u wa ki khynnah wa mih na kani ka skur u man ki kiwa stad wei ka mynried ki u man ko kawa tyrchaaiñ.
U ma Moonlight kam u kongsan da klam ya ki phang wa emkaam bha hei yatoh wa i puræ puthi kam i emkaam em ki bru wa skhem wa yah na khmat ya ka skur, ki bei ki pa wa pynchlur ya ki khon wow ka-it ki u khreh kot wow kheiñkor yei stad, ka SMC toh u pynlut por ko u pynku ya ka skur, ki nongsikai toh u krehlang ki waka SMC, wei toh u pyndooh yei pep skur chiteiñ por yong ki khynnah.
Ya ka yalang ha kani ka sngi da pynlai da u ma T. Phawa wei da yoh leh yei puræ na ka Baibl wa i ngooh blai na ka kong Planky Pyrtuh.
Da pynchongchit ya kani ka sngi wai pynemwarom ya kani ka skur da ki rwai na ki khynnah skur, i chaad pliang na ki dkhot ka Jingiaseng Kynthei wa kiwi de.
Discussion about this post