Jowai : Ynne ka sngi u man ko ka sngi wow sahkynmoo ya kiwa ngait ka Niamtre ka chnong Laskeiñ wa ka Nongkynrih, West Jaiñtia Hills hadien wada yoh ki yaka Khnap Thangbru næ kawa da tip leh ka ka Eco Friendly Crematorium kawa da pynwandur da u Tynde u ma Kambel Shullai.
Ya kani ka Khnap Thangbru yong ka Seiñ Kyntu Niamtre (Jt. Committee) ka Laskeiñ Nongkynrih da wai ha ka yalang wa tbian heiwa u Parliamentary Secretary ka jylla Meghalaya u ma Robinus Syngkon da man u kam u kongsan.
Ya kani ka Khnap da chna hadien wada yoh yarap poisa na ka tnat Forest & Environment Department (Social Forestry) kamwa T. 25 Lak.
Ya kani ka yalang da pyllai da u ma Rancha Lyngdoh, Chairman kani ka Joint Committee, da yoh yei ngooh blai na u ma Pyrshang Biam uwa man leh kam u Waheh Chnong ka Laskeiñ. Ha kani ka sngi da em leh ki sahep na ka tnat Forest & Environment, ki heh ka Seiñraij Jowai, ki paidbah kini ki chnong.
Dawai ya u mot ka Khnap da u ma R. Syngkon, i pyrtuid ki nongkitkaam da u Secretary warim ka Seiñraij Jowai u ma H. Toi, ya u chabi ka khnap da u Conservator of Forest, Social Forestry, u ma S.A. Nongsiej.
Ha kani ka yalang da yoh yei klam na u Waheh Chnong ka Laskein u ma Pynbait Lyngdoh, u Dolloi ka Elaka Raliang, u ma Chawas Lyngdoh, wa kiwi kiwi.
U kongsan ha kani ka sngi da e yaroh u ya u Tynde u ma Kambel Shullai uwa da chem ya kani ka Khnap Thangbru, wei da kular u leh wow e yarap yow pynmiat ya kani ka thaw.
Da yoh leh ya ki kyntien e khublei na u Secretary kani ka Committee u ma Eilad S. Suchiang, heijooh i por da yoh leh u sakhi ya ki chaad kiwa da pynkhreh da ki Khynroo Khyllod ka Niamtre Laskeiñ.
Discussion about this post