Shillong: U Chairman ka Meghalaya State Planning Board uwa man leh u MLA/MDC ka Nongkrem Constituency u Lambor Malngiang ynne ka sngi da wai u yaka Community Hall ha chnong Mawtharia, Pomlakrai hei emlang u P.T. Passah, BDO, Mylliem C&RD Block.
Ya kani ka Community Hall da chna hapoh ka SWRP 2019-2020.
U Malngiang hawa e yei klam da pynsñiaw u yei kmen wa da yei wow pyndep yei chna ya kani ka Community Hall wei daw pynyoh myntoi ko yaki paidbah. Da pdiang u wa ka Mawtharia da slem toh kawa da ieh mylliñ, da pyntip u leh wa ki kaam pynroi kam i pyndait ya ki Street Light, ka Greater Pomlakrai Water Supply Scheme, i chna yaka yung skur wa kiwi kiwi toh ki kaam wa daw sdang wei dang yang yei mynjur wa khaddooh yow sdang ya kini ki kaam.
U P. T. Passah da yaroh u yaka Dorbar Chnong ka Mawtharia ya i bynta wa bha wa da emkti ki wow yaleh pyrchah yaka khlam COVID-19 khamtam heipor wa em uwi wa yoh COVID-19 hapoh ka chnong ha u Naisan. I leh wei krehkaam kiwa chong chnong wa kitkhlieh da ka Dorbar Chnong wa ka chong hi waroh kawi da pynbood ya iwa leh kani ka chnong hawa chna yaka Community Covid Management Teams ha waroh ka District ka jylla da pyntip u.
Ha kani ka sngi da emlang leh u waheh chnong kamjooh ki Executive Member ka Dorbar Chnong wa kiwa chong chnong.
