Kam chibynta wow pynmankaam yei angnood ki paidbah ka thaaiñ Nongthyllep, Eastern West Khasi Hills District, ynnin ka sngi da yoh wow wai ya ka Nongthyllep Sub-Centre da u Lamphang ka Yung Dorbar Chna Aiñ ka jylla Meghalaya uwa man leh u MLA ka thaaiñ, u Metbah Lyngdoh ha ka yalang wa pynman da ka yung krehkaam ka District Medical and Health Officer, West Khasi Hills District, Nongstoin deiwa ya krehlang ka Directorate of Health Services (MI), Meghalaya wa ka Health Engineering Wing, Meghalaya, Shillong.
Ha kani ka sngi da emlang leh u MDC ka thaaiñ, u Batskhem Ryntathiang, u Syiem ka Hima Nongkhlaw, u Pa’iem PM Syiemlieh, u Deputy Commissioner ka Eastern West Khasi Hills District, u W. Nongsiej, u Superintendent of Police ka District, u M.B. Syiem, ki sahep yong ki chnat krehkaam waphær waphær yong ka sorkar, kiwa yahkhmat chnong, ki khynnah skur wa ki paidbah wa chong chnong ka Nongthyllep.
Hawa e yei klam, u Metbah Lyngdoh da e khublei wei da pynsñiaw u leh yei sñiawngooh wa ki wakreh ka chnat i chait i khiah, kiwa yahkhmat chnong wa kamjooh kitu waroh kiwa ya embynta wow pynmankaam ya kani ka Sub-Centre deiwa ong wa deiwa wai ya kani daw pynjan chooh chooh ya ki thaw sumaar cha ki paidbah khamtam kitu kiwa haap hapoh i pait ka Nongthyllep Sub-Centre.
Kamtæ da kyntu u khamtam ya ki manbei wa punkhon wow chim kabu ya kani ka Sub-Centre deiwa lai pynyoo Doctor tista wei wow yah leh ya ki khon khian wow chimbynta hei e tika hawa pynman da ka chnat neipor chei por.
Kiwi de kiwa da klam ha kani ka yalang toh u MDC ka thaaiñ, u Batskhem Ryntathiang, u Syiem ka Hima Nongkhlaw, u Pa’iem P.M Syiemlieh, u Deputy Commissioner ka Eastern West Khasi Hills District, u W. Nongsiej, ka District Medical & Health Officer ka West Khasi Hills District, Nongstoin, ka Dr. S.A. Lyngdoh, u Junior Specialist na ka yung krehkaam u District Medical & Health Officer, West Khasi Hills District, Nongstoin, u Dr. W. Sutnga wa u Sordar ka chnong Nongthyllep, u M. Ryntathiang.
Ka Nongthyllep Sub-Centre toh kawa e yei sumaar ya ki manbei wa punkhon wa ya ki khonboo, man ko leh ka thaw kha khon wa kawa pait leh yei kjut i chitom wa boon jait.
