Jowai: Ka Nartiang ynne ka sngi da yoh ka ya Police Station wa dang thymme hadien wa pynku kyrdan ya Police Investigation Center wei da wan wai ya ka da u Chief Minister, Dr Mukul M Sangma hei emlang u Home Minister u H.D.R. Lyngdoh wa u MLA ka thaiñ u S. Dhar.
U Mukul hei klam yong oo da ong wa i wai ya kani ka Police Station man ko kam chibynta i krehkaam ka sorkar wow yarap ya ki paidbah wow pynbiang ya i emkaam ki paidbah man ka sngi hei yatoh wa ka aiñ.
Da ong u leh wa i wai ya kani ka Police Sation toh wow pynwiar noh yei rukom yaphær i wan ki kaam roi kaam par hapoh ka jylla heiwa boon ki por da lai ki cha ki thaw sor katwa kiwa im cha nongkyndong won ym jooh yoo ki ki wei khlem ka aiñ ym yoh ya ka roi ka paar.
“Ka Nartiang toh kawa mahajon ha ka dustur riti ka wa da pawnaam nadooh warim wajah wei man ko leh ka laad ka luti ya ka bynta ka jylla yow pynku ya i khih i khan ki bru” da ong u Sangma.
Da pteiñ u deiwa ong wa ki kaam uiñke sawari toh wow pynkylla dur ya ka chnong ka thaw hadien wa khang ka NGT wow tih kamjooh wow challan mooyong iwa da ktah joor ya ka East kamjooh ya ka West Jaiñtia Hills. Kamtæ da emkaam wow kyruiñ biang i cha ka kaam rep yow kyrchaan ya ka im jah kpoh ki bru.
Hei yatoh won wa ki kaam tyngkheiñ aiñ da khut lang u ya waroh wow krehlang ki wa ki pulit yow pynduna ya ki tyrrah kari kamjooh ki kaam dih drugs.
Da yoh leh ya parom wa tbian yong kani ka PIC na u SP ka West Jaiñtia Hills u R. Muthu.
Kiwi de kiwa klam ha kani ka sngi toh u H.D.R. Lyngdoh, u S. Dhar, u DIG, Meghalaya u Dr. S.B. Singh, u Chief Executive Member ka Jaintia Autonomous District Council u Thombor Shiwat wa u Waheh Chnong ka Nartiang, wa kiwi kiwi.
Also Read: Kajiak chaphang ka Nartiang PIC ka wow pynku kyrdan cha ka Police Station
Discussion about this post