Ha ka sien wa nyngkong hapoh ka District da wai ya ka “Bal Vidyalaya” (Pre Primary School) ha chnong Mukhla Shohshrieh, West Jaiñtia Hills District ynne ka sngi kawa man skur neibynta ki khynnah kiwa em 3 hadooh 6 snem i rta wei ya kani ka skur da wan wai da u MLA ka thaaiñ, u Wailadmiki Shylla.
Ka tre yong kani ka skur, ka Rosemi Sari da ong ko wa i wan kani ka skur ha chnong Mukhla daw man ko i kyrkhu wa i myntoi bha ya ki khynnah khian neibhah i sikai phær ko na kiwi ki rukom sikai wei ka da yoh ko ya ka chah sikai (Training & Certification) wei ka sñiawthooh ko yei sikai wa phær wa pynsñiawthooh wei pynsñiawsuk ya ki khynnah khian. Wei i rukom hikai toh katkam ka juk wa katni lyngba ka “Digital Learning” kawa pynemkaam da ki kor Computer, Tablet wa ka Internet. Da yaroh ko leh chiboon ya ka CSC (Common Services Centre) e-Governance kiwa da yah luti wow wanrah ya kani ka skur ha chnong.
Da yoh leh i klam na u Marda Oo Myrchiang, District Manager CSC e Governance-SPV, West Jaiñtia Hills District uwa da batai yei krehkaam ki CSC ha District. Uwa da ong wa najrong i em kani ka skur sa kiwi ki yarap wa ki myntoi ki paidbah u yoh ki lyngba ka CSC kawa pynlai da ka tre yong kane ka skul toh wa ki CSC katni da man ki kam ki Bank, ki Education Centre, ki Insurance Service Provider, ki thaw dai ya ki symbe, ki sboh wa kiwi kiwi de ki kaam.
Neiliang u kongsan, u Wailadmiki Shylla da yaroh u ya ka tre yong kani ka skur deiwa ong wa man ko ka kynthai wa yaichah kawa thooh ki luti wow pynpliah ya idæ wei wow pynemkaam yei stat yong ka ha ka chnong kam deiwa wanrah ya kani ka Pre-School deiwa kreh chitom wei deiwa thooh laad yong ka.
Kamtæ da kyrpaad u ya ki manbei manpa wow phah ya ki khon yong ki cha kani ka skur khnang wow yoh yei sikai wa biang iwa man katkam ka juk wa katni. Neibhah da ong u wa ki khynnah kiwa em ya ka rta 3 hadooh 6 snem i jabieñ yong ki dang man iwa lung wei lada hikai da iwa sih daw smat ki wow tip da iwa sih wei lada hikai deiwa bha daw tip ki deiwa bha. Wei na kini ki daw kani ka skur da em chwa ko ki rukom sikai iwa man katkam i bor yong ki khynnah.
Kamtæ da pynchlur u leh ya kiwi wow lai pynpliah ki ha kiwa boon ki jait kaam yow ye ki u seiñ khih dei yong idæ ha kini ki por wa duna kreh.
U Comfort Rympei, Assistant Manager CSC-SPV, Meghalaya hawa e yie klam da ong u wa kani ka skur toh kawa em Class Nursery, KG wa UKG wei dei rukom hikai wa thymme ki khynnah daw yoh myntoi bha ki heiwa daw skem nadooh wa dang khian wa chah sikai ki.
Kiwi de kiwa klam kynthup ki ya ka Ameecia Pariat DM CSC-SPV, West Jaiñtia Hills District, u Buhlut Suna, Waheh Chnong ka Mukhla Nongrim wa na u Nang Oo Chwa Sari
Da pynwai ya kani ka yalang deiwa kitbok kitrwiang ya ka Rosemi Sari wow pynkrehkaam bha ko ya kani ka skur.
